Ramazon Hayitingiz muborak bo‘lsin!
Aziz vatandoshlar, hurmatli Jizzax davlat pedagogika instituti professor-o‘qituvchilari, qadrli talabalar. Muborak Ramazon oyi tugab, yurtimizga Ramazon hayiti – Iyd al Fitr bayrami kirib keldi.
Ramazon hayiti islomdagi eng muqaddas bayramlardan biri hisoblanib, bag‘rikenglik, birodarchilik va rahm-shafqat ramzi hisoblanadi.
Har bir musulmon bu muborak kunni intiqlik bilan kutadi.
Butun dunyo musulmonlari Ramazon oyi davomida ulug‘ bayramni kutib, ro‘za amalini ado etdilar, taravveh namozlarida qoyim bo‘ldilar, ma’nan o‘sishga, muhtojlarga yordam berishga intildilar.
Aziz yurtdoshlar! Ramazon oyi har birimizga haq yo‘ldan yurishga va ma’naviy barkamollikka erishishga imkon berdi. Ishonamanki, orangizda Ko‘pchilik bu oyda o‘zlarining zararli odatlaridan forig‘ bo‘ldilar, o‘z oilalariga ko‘proq vaqt ajratishga harakat qildilar. Shu fazilatlarni oddiy kunlarda ham saqlab qolishingizni tilab qolamiz.
Shunday muqaddas kun kirib kelayotgani bilan barcha yurdoshlarimizni, musulmon ahlini o‘z nomimdan muborakbod etaman. Bugungi pandemiya va karantin davrida hammada moliyaviy qiyinchiliklar bo‘lishiga qaramay, xayr-ehson bir necha marotaba ko‘paydi.
O‘z mablag‘larini bolalar va keksa yoshlilarga yordam ko‘rsatishga yo‘naltirgan Saxovatpesha tadbirkorlarimiz qatorida Jizzax davlat pedagogika instituti jamoasi tomonidan suv ostida qolgan hududlardan kelgan hamyurtlarimizga moddiy va ma’naviy yordam ko‘rsatildi va ko‘rsatilmoqda. Bag‘rikeng halqimiz mana shunday sinovli kunlarda yanada jipslashdi desak xato qilmagan bo‘laman.
Istardimki o‘zbek xalqining har bir xonadonida fayzu-barokatlar arimasin, boshi to‘ydan chiqmasin, nimaiki ezgu niyatlari bo‘lsa ijobatini bersin. Barcha sog‘-salomat bo‘lib, keyingi yilga ham bag‘ri butunlikda ushbu muborak bayramni kutib olish nasib etsin.
Alloh, yurtimizni tinch, yanada obod va farovon, osmonimizni musaffo qilsin. Jonajon O‘zbekistonimiz ravnaqiga ravnaq, obro‘siga obro‘ qo‘shaversin.
Bu bayramning sharofati har bir uyga kirib borsin!
Jizzax davlat pedagogika instituti rektori, prof. Sh.S. Sharipov.
