Tashkil topishi

Rus adabiyoti va uni o‘qitish metodikasi kafedrasi o‘z ildizlarini 1974-yilda tashkil etilgan rus tili va adabiyoti kafedrasidan oladi. 1984-yilgacha ushbu yo‘nalishdagi ta’lim “Rus va chet el adabiyoti” kafedrasi nomi bilan yuritilib, dastlab filologiya fanlari nomzodi, dotsent V.I. Prejevozinskiy, keyin dotsent E.V. Smolyakov rahbarlik qilgan. 1984–2011-yillarda kafedrani dotsent Dilorom Xodjimetova boshqargan. 1998-yilda fakultetdagi kafedralar birlashtirilgach, 2011–2018-yillarda dotsent Dilorom Xodjimetova, so‘ngra dotsent Zulfiya Pardayeva rahbarlik qildi. 2020-yildan buyon kafedraga dotsent Zamira Jalmatova rahbarlik qilib kelmoqda.
 

Rivojlanish bosqichlari

Kafedra faoliyati davomida o‘quv-uslubiy ishlar, xalqaro hamkorlik va ilmiy izlanishlar keng yo‘lga qo‘yildi. 2010-yil yanvar oyidan “Debyut” to‘garagi tashkil etilib, talabalarni pedagogik amaliyotga tayyorlash, interfaol metodlar (“Klaster”, “Ikki qismli kundalik”, “Sinkveyn” va boshqalar) orqali dars jarayonini boyitishga xizmat qilmoqda. Kafedra professor-o‘qituvchilari Janubiy Federal universitetida malaka oshirish kurslarini tamomlab, zamonaviy adabiyot va metodika bo‘yicha ma’ruzalar o‘qib keladi. Shuningdek, kafedra a’zolari Rossiya, Qozon va boshqa xorijiy oliy ta’lim muassasalari bilan ilmiy-uslubiy aloqalarni yo‘lga qo‘ygan.
 

Bugungi faoliyati

Hozirgi kunda kafedra Rus tili va adabiyoti fakulteti tarkibida faoliyat yuritadi. Professor-o‘qituvchilar tarkibida filologiya fanlari doktori, dotsentlar, katta o‘qituvchilar va tajribali mutaxassislar bor. Kafedra o‘quv jarayonida elektron resurslar, onlayn ma’ruzalar va multimedia vositalaridan foydalanadi. “Debyut” to‘garagi kafedra professori v.b. Oleg Kim rahbarligida ishlaydi. Iqtidorli talabalar markazi katta o‘qituvchi Feruza Shukurova boshchiligida 25 nafar iste’dodli talabani birlashtiradi, ular orasida Navoiy va Prezident nomidagi davlat stipendiyasi sohiblari bor.