Yangi 2026/2027 o‘quv yili oldidan Jizzax davlat pedagogika universitetida talabalar turar joylari, ijara xonadonlari hamda abituriyentlarni joylashtirish bo‘yicha tayyorgarlik ishlari tizimli ravishda olib borilmoqda.
Ayni paytda universitet tasarrufida 5 ta talabalar turar joyi mavjud bo‘lib, ularning umumiy sig‘imi 2 016 o‘rinni tashkil etadi. Shuningdek, yangi o‘quv yiliga tayyorgarlik doirasida universitetga yaqin hududlardan qariyb 500 ta ijara xonadoni o‘rganilib, ro‘yxatga olindi. Mazkur xonadonlar orqali 3 500 nafargacha talabani ijara asosida joylashtirish imkoniyati yaratilgan.
Abituriyentlar va talabalarni joylashtirish jarayonlarini tezkor muvofiqlashtirish maqsadida universitetda Ma’lumotlar markazi faoliyati yo‘lga qo‘yildi. Markazda 51 nafar tyutor navbatchiligi tashkil etilgan bo‘lib, yangi o‘quv yilida birinchi kursga tavsiya etilgan abituriyentlarga hujjatlarni rasmiylashtirish va turar joy masalalarida amaliy ko‘mak ko‘rsatish uchun 25 nafarga yaqin tyutor biriktirilishi rejalashtirilgan.
Mazkur tizim orqali talabalar va abituriyentlarni qulay, xavfsiz hamda universitetga yaqin turar joylar bilan ta’minlash, joylashtirish jarayonlarini tizimli va shaffof tashkil etish ko‘zda tutilgan.
