Asrlar davomida ulug‘ shoir va olimlar, mohir bastakorlar, hofiz va sozandalarning mashaqqatli mehnati va fidoyiligi, ijodiy tafakkuri bilan sayqal topib kelayotgan maqom san’ati nafaqat yurtimiz va sharq mamlakatlarida, balki dunyo miqyosida katta shuhrat va e’tibor qozongan. Bugun ana shunday betakror an’analarni targ‘ib qiluvchi O‘zbek milliy maqom sa’nati markazi tarkibidagi Yunus Rajabiy nomidagi maqom ansambli xonandalari xalq hofizlari Ahmadjon Dadaev, Ismoiljon Vahobov shoir Nuriddin Aminjonovlar Jizzax davlat pedagogika institutida tashkil etilgan “Mahorat darslari”da ishtirok etishdi.
Milliy maqom san’ati xalqimiz madaniy merosining ajralmas qismi hisoblanadi, – deydi Jizzax davlat pedagogika instituti Yoshlar bilan ishlash masalalari bo‘yicha prorektor Sarvar Nazarqosimov . – Bu san’at o‘zining boy qadimiy tarixi, teran falsafiy ildizlari, betakror badiiy uslubi va ijodiy an’analari bilan milliy musiqa madaniyatimizning asosini tashkil etadi. Afsuski, biz ana shu madaniy merosni o‘rganib, keng targ‘ib etish o‘rniga uni unutish darajasiga kelib qolgan edik. Prezidentimizning 2017 yil 17 noyabrdagi “O‘zbek milliy maqom san’atini yanada rivojlantirish chora-tadbirlari to‘g‘risida”gi qarori asosida O‘zbek milliy maqom san’ati markazi tashkil etildi. Shu bois milliy maqom san’atimizni o‘rganish, uni tadqiq etish imkoniyati yana paydo bo‘ldi.
Institutning Sa’natshunoslik fakulteti talabalari uchun “ mahorat darsi” sifatida tashkil etilgan tadbirda so‘zga chiqqan O‘zbekistonda xizmat ko‘rsatgan madaniyat xodimi, Yozuvchilar uyushmasi a’zosi, shoir Nuriddin Aminjonov Jizzax davlat pedagogika instituti tomonidan tashkil etilgan mahorat darsidan maqsad o‘zaro tajriba almashish ekanligini ta’kidladi. Maqomni yuragi, joni g‘azal bo‘lsa uning qanoti ohang, tinglovchiga huzur beradigani esa so‘zdagi ma’nodir ,- deydi shoir Nuriddin Aminjonov.
Maqom musiqa ijodiyotining boshqa turlaridan badiiy mukammalligi, kuy hamda shakl tuzilishlari, lad va usul tizimlari hamda ilmiy va amaliy asoslari puxta ishlangani bilan farq qiladi. Maqom musiqa, she’riyat hamda raqs san’atlarini mujassamlashtiruvchi mushtarak badiiy durdonadir. Bo‘lib o‘tgan mahorat darslarida xalq hofizlari Ahmadjon Dadaev, Ismoiljon Vahobovlar O‘zbekistonda maqom asarlari va turkumlari — Buxoro “Shashmaqom”i, “Xorazm maqomlari” hamda “Farg‘ona — Toshkent maqom yo‘llari” turkumlaridan yig‘ilganlarga ijro etib berishdi. O‘z navbatida Jizzaxlik sa’natga oshufta va badiiy durdonamiz hisoblanmish maqomga mehr qo‘ygan talaba yoshlar ham xalq suygan , yillar davomida o‘z qadrini yo‘qotmagan maqomlardan parchalar kuylab berib ustozlar olqishiga sazovar bo‘lishdi. O‘ziga xos bellashuv tarzida bo‘lib o‘tgan tadbir yig‘ilganlar qalbiga o‘zgacha zavq bag‘ishladi desak xato qilmagan bo‘lamiz.
Jizzax davlat pedagogika instituti axborot xizmati
