Joriy yilning 14 noyabr kuni 10.00 da Jizzax davlat pedagogika instituti axborot- resurs markazining majlislar zalida Xorijiy tillar fakulteti hamkorligida «INFOLIB UZBEKISTAN» Milliy axborot-kutubxona haftaligi doirasida “17 noyabr-Xalqaro talabalar kuni” munosabati bilan “Talabalik -oltin davrim” mavzusida tadbir tashkil etildi.
Tadbirni institut murabbiylar kengashi raisi A. Qayumov kirish so‘zi bilan ochib berdi: “Kitob qaysi janrda o‘qilmasin o‘qishli bo‘lishi kerak. Kitobning o‘qishli bo‘lishi muallifning kitobxonga aytadigan to‘la mag‘izli va juda zarur fikri bo‘lganligini ko‘rsatadi”,-deya buyuk adib Abdulla Qahhor fikrini keltirdi.
Xorijiy tillar fakultetining yoshlar bilan ishlash bo‘yicha dekan o‘rinbosari F.Usanov so‘z olib, talabalarni yaqinlashib kelayotgan “Talabalar kuni” bilan qizg‘in tabrikladi hamda kitoblar olamining nechog‘lik insoniyat hayotida muhim rol o‘ynashini takidlab o‘tdi.
Shundan so‘ng, Amerika davlatidan tashrif buyurgan ingliz tili o‘qituvchisi V. Marsel ham so‘zga chiqdi va kutubxonadan olgan taasurotlarini tinglovchilar bilan o‘rtoqlashdi, institut kutubxonasining nechog‘lik boy ekanini va bu yerda 100 yillik bilimlar saqlanayotgani, bu manbalardan esa o‘z vaqtida unumli foydalanish kerakligini barcha yig‘ilganlarga aytib o‘tdi.
Tadbirning asosiy badiiy qismida Xorijiy tillar fakulteti talabalari ishtirokida qiziqarli sahna ko‘rinishlari va video roliklar yig‘ilganlar e’tiboriga havola etildi.
Badiiy qismdan so‘ng kutubxona xodimlari tomonidan tashkil etilgan viktorina savollari e’lon qilindi va savolning javobini to‘g‘ri topgan zukko tomoshabinlarga esdalik sovg‘alari topshirildi.
Tadbir yakunida tadbirda ishtirok etgan faol talabalar kutubxona ma’muriyati tomonidan faxriy yorliqlar bilan taqdirlandi.
Mazkur tadbirda jami 112 nafar ishtirokchi qatnashdi.
