Jizzax viloyati oliy ta’lim muassasalari talabalari forumi yuqori saviyada tashkil etildi.
Ushbu forumda Jizzax viloyatidagi 3 ta-Jizzax davlat pedagogika instituti, Jizzax politexnika instituti, O‘zbekiston Milliy universiteti Jizzax filiali talabalari ishtirok etishdi. Dastavval talabalar viloyatimizdagi barcha mavjud siyosiy partiyalardan O‘zbekiston Respublikasi Prezidentligiga nomzod sifatida ko‘rsatilgan nomzodlarning ishonchli vakillari bilan uchrashuvlarda ishtirok etishdi. Savol javoblar, qiziqarli bahs munozara sifatida o‘tgan uchrashuvda har uchchala OTM lari talabalari faol ishitrok etishdi
Kezi kelganda shuni ham ta’kidlash joizki, OTM larida ta’lim olayotgan yoshlarning aksariyati bu yil ilk marta saylovda ishtirok etadi. Boshqacha qilib aytganda, yangi O‘zbekiston fuqarosi sifatida shu aziz yurt kelajagi uchun daxldorlik burchini his etish imkoniga ega bo‘ladi. Saylov kabinasida yolg‘iz qolib, “Men nega keldim bu yerga?”, “Kimga ovoz berishim kerak?”, “Mening ovozim mamlakatim rivoji uchun nima beradi?” degan savollar bilan yuzma-yuz qoladi. Aniqroq aytganda, har bir talabamiz o‘z hayotida birinchi bor vatan kelajagi uchun ovoz beradi, Bu esa tabiiyki, ularni saylov qonunchiligi bilan atroflicha tanishtirish, saylov tizimi to‘g‘risida tushunchalar berish, saylov jarayonlarining mohiyati va saylovda ishtirok etadigan fuqaroning burchi, majburiyatlari to‘g‘risidagi tushuncha, tasavvurlarini puxta shakllantirishni taqozo qiladi. Jizzax politexnika institutida “Saylov mening nigohimda” mavzusidagi ko‘rik tanlovda har uchchala OTM talablari ana shunday savollarga javoblar olish bilan bir qatorda saylov to‘g‘risida o‘z bilimlarini yanada mustahkamlashdi.
Talabalarining fuqaro sifatidagi siyosiy dunyoqarashini shakllantirish, kengaytirish va boyitish maqsadida Jizzax davlat pedagogika institutida “Saylov-2021: Kelajaging uchun ovoz ber” shiori ostida viloyat adliya boshqarmasi rahbarlari bilan tashkil etilgan brifing davomida yoshlarimizga saylov nima, unda ovoz berishning maqsadi va mohiyati, tartibi va qoidalari, amaldagi saylov qonunchiligidagi o‘zgarish va yangiliklar to‘g‘risida to‘liq va batafsil tushunchalar berib o‘tildi. Yosh saylovchilarni har tomonlama qo‘llab-quvvatlash va ularga ko‘maklashish uchun mo‘ljallangan siyosiy-intellektual o‘yin va ko‘rik-tanlovlar albatta o‘z samarasini beradi. Talabalar forumiga “Men saylovchiman” viktorinasi hamda “Saylov-2021:Kelajaging uchun ovoz ber” gala konserti yakun yasadi.
