Jizzax davlat pedagogika universitetida FLTAL yo‘nalishiga bag‘ishlangan 16-xalqaro ilmiy konferensiya o‘tkazilib, unda mahalliy va xorijiy olimlar ishtirok etdi.

Anjumanni universitet rektori ochib, uning ilmiy-amaliy ahamiyati, xalqaro hamkorlikdagi o‘rni hamda xorijiy spikerlarga minnatdorlik bildirdi. Shuningdek, talabalarning faol bo‘lishi va xorijiy tillarni puxta o‘rganish zarurligi alohida ta’kidlandi.

Tadbirda British Councilning O‘zbekistondagi direktori Michael Houlgate ishtirok etib, tashkilot faoliyati hamda oliy ta’lim sohasidagi hamkorlik loyihalari haqida ma’ruza qildi.

Konferensiya doirasida o‘zbek va ingliz tillarida ilmiy taqdimotlar davom etdi. Jumladan, professor Amy S. Thompson tomonidan til o‘rganishda psixologik (affektiv) omillarning o‘rni yoritilib, o‘quvchilarning motivatsiyasi, ishonchi va faol nutq amaliyotining ahamiyati haqida muhim ilmiy xulosalar taqdim etildi.

Tadbir yakunida sport va ilmiy yo‘nalishlarda yuqori natijalarga erishgan universitet talabalari tantanali ravishda taqdirlandi. Xalqaro va respublika miqyosidagi musobaqalarda muvaffaqiyat qozongan talabalar universitet nufuzi va sha’nini yuksaltirishga qo‘shgan hissalari uchun tashakkurnomalar bilan e’tirof etildi.

Konferensiya yakuni universitetning badiiy jamoasi tomonidan tayyorlangan konsert dasturi bilan davom etdi. Milliy kuy-qo‘shiqlar va raqslar xorijiy mehmonlarda katta taassurot qoldirdi.

Shuningdek, tashrif doirasida mehmonlar universitet infratuzilmasi, sport maydonlari va o‘quv laboratoriyalari bilan tanishib, ayniqsa In-vitro laboratoriyada olib borilayotgan amaliy ishlarni yuqori baholadilar.