Jizzax davlat pedagogika universitetida O‘zbekiston Respublikasi Davlat mustaqilligining 35-yilligiga bag‘ishlangan «Mustaqillik to‘yi» bayram tadbirining asosiy tantanalari o‘tkazildi.
Tadbirni universitet rektori, professor Maksudjan Abdullayevich Yuldashev tabrik so‘zi bilan ochib berdi. Rektor o‘z nutqida mustaqillik yillarida mamlakatimizda, xususan, ta’lim sohasida amalga oshirilgan islohotlar, universitetning bir yillik faoliyati davomida erishilgan natijalar, yutuqlar hamda istiqboldagi rejalarga to‘xtalib o‘tdi.
Tantanali tadbirning badiiy qismi «Tarix — istiqlol — bugun — yoshlar — kelajak» g‘oyasi asosida tashkil etildi. Dasturdan Vatan va istiqlolni tarannum etuvchi milliy raqs kompozitsiyalari, o‘zbek mumtoz musiqasi, zamonaviy estrada qo‘shiqlari, talabalar ijodiy guruhlari hamda «Talabalar teatr studiyalari»ning sahna ko‘rinishlari o‘rin oldi.
Shuningdek, «Yangi O‘zbekiston yoshlari» sahna kompozitsiyasi namoyish etildi. Yosh ijodkorlarning musiqiy va sahnaviy chiqishlari, milliy san’at namunalari hamda ijodiy dasturlar tadbirga ko‘tarinki ruh bag‘ishladi.
