Bolalarga bering dunyoni!!!

Butun dunyo bo‘ylab, har yilning 1 iyun kuni “Xalqaro bolalarni himoya qilish kuni” sifatida nishonlanadi. Ushbu bayram ko‘pchilik davlatlarda “Xalqaro bolalar huquqlarini himoya qilish kuni” sifatida ham e’tirof etiladi. “Xalqaro bolalar kuni” uchun maxsus bayroq ham ishlab chiqilgan. Mazkur bayroq o‘zining ramziy ma’nosiga ega. Orqa fondagi yashil rang yuksalish, beg‘uborlik, farovonlik ramzi bo‘lsa, markazdagi Yer shari va uning atrofidagi qizil, ko‘k, sariq, oq va qora ranglar dunyoning istalgan burchagidagi bolalar irqi, millatidan qat’iy nazar teng ekanligini ifodalaydi. Ushbu kun 1925 yil Jenevada bolalar farovonligiga bag‘ishlangan Butunjahon konferensiyasida ta’sis etilgan bo‘lsa, oradan 25 yil o‘tib, 1950 yildan bayram sifatida nishonlab kelinadi. Bolalar hayotimiz davomchilari, kelajagimiz egalaridir. Binobarin, ularni asrab-avaylash, har tomonlama barkamol qilib voyaga yetkazish har bir davlat, har bir oila, har bir ota-onaning muqaddas burchidir. O‘zbekistonda ham farzandlarimiz ana shunday mehr-muhabbat, ulkan g‘amxo‘rliklar og‘ushida voyaga yetmoqda. Aziz bolajonlar sizni Jizzax davlat pedagogika instituti jamoasi nomidan bugungi bayram bilan  muborakbod etaman. Ko‘zimiz nuri, qalbimiz qo‘ri aziz bolajonlar doimo sog‘ bo‘ling. O‘zingizdek sof va beg‘ubor orzularingiz ushalaversin. Jizzax davlat pedagogika isntituti rektori prof. Sh.S.Sharipov