Jizzax davlat pedagogika universiteti sport majmuasida oliy ta’lim muassasalari talabalari o‘rtasida an’anaviy “Amir Temur vorislari” harbiy-sport musobaqasining viloyat bosqichi bo‘lib o‘tdi.
Mazkur bellashuv yoshlar o‘rtasida vatanparvarlik tuyg‘usini mustahkamlash, ularni harbiy-amaliy sport turlariga keng jalb etish hamda jismoniy va ma’naviy barkamolligini oshirishga qaratilgan.
Musobaqada viloyatdagi yetakchi oliy ta’lim muassasalari jamoalari ishtirok etib, ishtirokchilar belgilangan nizom asosida turli harbiy-sport sinovlarida o‘z mahoratlarini namoyish etdilar. Bellashuvlar yuqori saviyada tashkil etilib, jarayonlar mutaxassislar va tibbiyot xodimlari nazorati ostida o‘tkazildi.
Qizg‘in va murosasiz kechgan bahslar yakuniga ko‘ra, Qozon (Volgabo‘yi) federal universiteti filiali jamoasi 1-o‘rinni egalladi. Jizzax davlat pedagogika universiteti jamoasi 2-o‘rin, Jizzax politexnika instituti jamoasi esa 3-o‘ringa sazovor bo‘ldi.
Musobaqa g‘oliblari respublika bosqichida viloyat sharafini himoya qilish huquqini qo‘lga kiritdi. Mazkur tadbir yoshlarning jismoniy tayyorgarligi va vatanparvarlik ruhini yuksaltirishda muhim ahamiyat kasb etdi.
