Jizzax davlat pedagogika universitetida viloyat Oila va xotin-qizlar boshqarmasi hamkorligida 11-oktyabr — Xalqaro qizlar kuni munosabati bilan “Erta nikohga barham berish va qizlar huquqlariga sarmoya kiritish” shiori ostida “Qizlar forumi” tashkil etildi.

Forumda viloyat hokimi o‘rinbosari, universitet rahbariyati, turli sohalarda faoliyat yuritayotgan rahbar ayollar, olimalar, tadbirkorlar hamda 500 nafardan ortiq talaba-qizlar, jumladan, “Qizlarjon” va “Lider qizlar” klublari a’zolari ishtirok etdi.

Tadbirda erta nikohning oldini olish, qizlarning huquqiy savodxonligini oshirish, ta’lim olishi va salohiyatini ro‘yobga chiqarishi uchun imkoniyatlarni kengaytirish masalalari muhokama qilindi. Spikerlar ma’ruzalari tinglanib, talaba-qizlarning fikr va takliflari yuzasidan muloqot o‘tkazildi.

Forum yakunida xalqaro miqyosda e’tirof etilgan qizlar tashakkurnoma va esdalik sovg‘alari bilan taqdirlandi. Madaniy chiqishlar tadbir dasturidan o‘rin oldi.