Tadbirni institut rektori, professor A.J.Xolbekov kirish so‘zi bilan ochib berdi. Eng avvalo, biz ushbu tadbirdan ko‘zlangan maqsadni bilib olishimiz zarur. Maqsad, siz aziz yoshlarning siyosiy faolligingizni oshirish, partiya tizimiga yosh yetakchilarni jalb etish, istiqbolli yosh kadrlar zahirasini shakllantirish yo‘nalishida amalga oshirilayotgan ishlarni yanada kuchaytirishdan iboratdir. Mamlakatimiz har bir sohada kundan-kun yuksalib bormoqda. Yangidan yangi ixtirolar, islohotlar amalga oshirilmoqda. Zamon bilan hamnafas bo‘lishda eng birinchi navbatda inson o‘z haq-huquqini chuqur anglashi zarur deb o‘ylayman. Hozirda yurtimizda yoshlarga juda ko‘plab imkoniyatlar eshigi ochilgan. Bugungi tadbir ham siz uchun va sizning kelajakdagi rejalaringiz uchun bir yo‘nalish bo‘ladi degan umiddaman deb so‘zini yakunladi.
Institut rektori, professor A.J.Xolbekovning kirish so‘zidan so‘ng Fuqarolik jamiyati shakllanishini monitoring qilish mustaqil instituti Jizzax hududiy bo‘linmasi rahbari B.Xolbo‘taev “Demokratik huquqiy davlat qurish va fuqarolik jamiyatini shakllantirishda siyosiy partiyalarning o‘rni” mavzusida ma’ruza o‘qidi. Har bitta partiyani jamiyatda o‘zining o‘rni borligi va o‘zining elektratiga ega ekanligini gapirib o‘tdi. Shu jumladan, partiyalar orasida O‘zLiDep ning hozirgi kundagi faoliyati yuqori nufuzga ega ekanligini ta’kidlab so‘zini yakunladi.
Fuqarolik jamiyati shakllanishini monitoring qilish mustaqil instituti Jizzax hududiy bo‘linmasi rahbari B.Xolbo‘taevaning ma’ruzasidan so‘ng pedagogika fakul’teti katta o‘qituvchisi A.Tangirov “Ta’lim muassasasida kadrlar tayyorlash bo‘yicha amalga oshirilayotgan tadbirlar, malakali kadrlar tayyorlash borasidagi istiqbolli dasturlar to‘g‘risida” ma’ruza o‘qish uchun so‘zga chiqdi. U o‘z ma’ruzasida mustaqillikdan keyin barcha sohlarga e’tibor qaratilayotgani kabi, ta’lim sohasiga ham kuchli e’tibor bo‘layotganligini aytib o‘tdi. Xususan, 1997 yil 29 avgustdagi qabul qilingan Kadrlar tayyorlash milliy modelining asosiy qismlari bo‘lgan shaxs, davlat va jamiyat va fan to‘g‘risida to‘xtalib o‘tdi. Shundan keyin, tarbiya, malaka oshirish masalalariga e’tiborini qaratdi. So‘zining yakunida bugungi kunda fan davlat homiyligi ostida bo‘lishi zarur deb ta’kidladi.
Tadbir davomida “O‘zLiDep yangi imkoniyatlar, amaliy ishlar va kelajak kadrlari partiyasi” mavzusiga doir slayd-taqdimoti namoyish etildi. So‘ngra, O‘zLiDep Jizzax viloyat Kengashi Yoshlar bilan ishlash bo‘limi mudiri O.Norjigitov talabalarni partiya a’zoligiga qabul qilish shart-sharoitlari, imkoniyatlari va vazifalari to‘g‘risida tushunchalar berib o‘tdi.
Shundan so‘ng, talabalar bilan ma’ruzachi mutaxassislar o‘rtasida ochiq muloqot, savol-javoblar bo‘lib o‘tdi va tadbirni O‘zLiDep Jizzax viloyat Kengashi Yoshlar bilan ishlash bo‘limi mudiri O.Norjigitov yakunladi.
