Tantanali marosimni O‘zbekiston Respublikasi Maktabgacha va maktab ta’limi vaziri E’zoza Gafurjonovna Karimova ochib berdi.

Vazir o‘z tabrik so‘zida bitiruvchilarni samimiy muborakbod etib, ularning mamlakat ta’lim tizimi ravnaqi yo‘lida munosib xizmat qilishlariga ishonch bildirdi. Tadbirda sport, san’at va ilm-fan yo‘nalishlarida yuksak natijalarga erishgan bir guruh bitiruvchi talabalarga O‘zbekiston Respublikasi Maktabgacha va maktab ta’limi vazirligining faxriy yorlig‘i, bakalavriat va magistratura bosqichlarini namunali hamda bir qator yutuqlari bilan tamomlagan bitiruvchilarga imtiyozli diplomlar tantanali ravishda topshirildi.

Tantanali marosim doirasida farzandlarini bilimli, vatanparvar va barkamol inson etib tarbiyalash yo‘lidagi mehnati hamda fidokorligi uchun Jizzax davlat pedagogika universitetining 6 nafar bitiruvchisining ota-onalari O‘zbekiston Respublikasi Oliy ta’lim, fan va innovatsiyalar vazirining tashakkurnomasi bilan taqdirlandi.

Tantanali marosimi universitetning iqtidorli talabalari tomonidan tayyorlangan gala-konsert dasturi bilan yakunlandi. Milliy va zamonaviy musiqiy chiqishlar tadbirga bayramona kayfiyat bag‘ishladi. Bayram yakunida osmonni yoritgan salyutlar marosimning eng yorqin lahzalaridan biriga aylandi.