Jizzax davlat pedagogika universitetida bugungi kunda 170 nafar doktorant faoliyat olib bormoqda.

Ularning ilmiy izlanishlari, yaratilgan sharoitlardan foydalanish samaradorligi hamda dolzarb muammolar yuzasidan universitet rektori Maqsudjon Yuldashev ishtirokida uchrashuv bo‘lib o‘tdi. Uchrashuvni ochib bergan rektor Maqsudjon Yuldashev o‘z nutqida:

“Bugungi kunda universitet ilmiy salohiyati atigi 34 foizni tashkil etmoqda. Afsuski, bu ko‘rsatkich quvonarli emas. Yaratilayotgan imkoniyatlarga qaramay, o‘tgan yili doktorantura bitiruvchilaridan atigi ikki kishi ilmiy ishini himoya qildi. Bu esa biz kutgan natija emas. Doktorantlarga bildirilgan ishonch oqlanmayapti”, – deya ta’kidladi.

Rektor o‘z so‘zida mas’uliyat va javobgarlikni chuqur his etishga chaqirib, quyidagilarga alohida urg‘u berdi:

• Hozirda 3-kursda 21 nafar doktorant tahsil olmoqda, biroq shulardan atigi 8 nafari kafedra seminaridan o‘tgan.

• Ko‘pchilik doktorantlar “olma pishib og‘zimga tush” qabilida faoliyat yuritmoqda.

• Natija ijobiy bo‘lishi uchun tashabbuskorlik, faol izlanish va mas’uliyatni oshirish zarur.

“Muammoni birgalikda aniqlab, unga yechim topishimiz kerak. Aks holda, yana o‘tgan yilgi natijalar bilan ortda qolamiz”, – dedi universitet rahbari.

Uchrashuv davomida doktorantlarning savol va takliflari tinglandi. Jumladan:

• onlayn xorijiy til kurslarini ochish,

• xorijiy stajirovkalarda o‘qituvchilar qatori doktorantlarni ham ishtirok ettirish,

• rag‘batlantirish tizimini kuchaytirish,

• doktorantlarga bevosita ko‘mak beruvchi professorlar guruhini tashkil etish kabi takliflar qo‘llab-quvvatlandi.

Tadbir yakunida rektor Maqsudjon Yuldashev ushbu uchrashuvni “tanishtiruv va muloqotning debochasi” sifatida baholab, shunday dedi: “Universitetimizda doktorantlarni qiynaydigan muammo bo‘lmasligi kerak. Sizlarga yaratilgan imkoniyatlardan unumli foydalaning. Bugundan boshlab barchangiz men uchun shogirdsiz”.