Ayni kunlarda Jizzax davlat pedagogika instituti fizika-matematika fakultetida Rossiyaning Dubna shahridagi Birlashgan Yadro tadqiqotlari instituti katta ilmiy xodimi, fizika-matematika fanlari nomzodi hamyurtimiz Qaxramon Ziyodullaevich Mamatqulov talabalarga “Master-klass” darslarini va ilmiy-amaliy o‘quv mashg‘ulotlarini o‘tkazmoqda.
Jizzax davlat pedagogika instituti fizika-matematika fakultetining sobiq talabasi, bugungi kunda Rossiyaning Dubna shahridagi Birlashgan Yadro tadqiqotlari institutining katta ilmiy xodimi, fizika-matematika fanlari nomzodi Qahramon Mamatqulov biz bilan suhbat jarayonida BYaT institutining yaratilish tarixi, laboratoriyalarida yadro fizikasi sohasida olib borilayotgan ilmiy tadqiqotlar hamda institutda yo‘lga qo‘yilgan xalqaro aloqalar to‘g‘risida batafsil to‘xtalib quyidagilarni hikoya qildi: “Bugungi kunda Birlashgan yadro tadqiqotlari institutida dunyodagi 18 ta davlat bilan hamkorlik aloqalari yo‘lga qo‘yilgan. Jumladan, Jizzax Davlat pedagogika institutida ham ustozimiz R.Bekmirzaev rahbarligida va u kishining sa’y-harakatlari bilan ko‘plab yurtdoshlarimiz, institutning sobiq talabalari Dubnada bo‘lib qaytishgan va hozirgi kunda ham u yoqda faoliyat olib bormoqdalar. Men rahbarlik qilayotgan bo‘lim ayni paytda tibbiyot sohasida ko‘plab kasalliklarni oldini olish borasida izlanishlar olib bormoqda. Maqsadimiz insoniyatga xizmat qiladigan foydali ishlarni amalga oshirish. Ayni paytda inson tanasidagi zararlangan molekulalarni aniqlab, uni bartaraf etish va onkologik xastaliklarni oldini olish borasida tadqiqotlar olib borayapmiz. O‘ylaymanki bu izlanishlarimiz o‘z samarasini beradi.
Bugun men Jizzax davlat pedagogika institutida talabalarga dars berish bilan bir qatorda amaliy mashg‘ulotlarni ham o‘tayapman. Talaba yoshlarimizning intilishi juda yaxshi. Men talabalik chog‘imda o‘zbek tili bilan bir qatorda rus va ingliz tillarini ham mukammal o‘rganganman. Istardimki, talaba yoshlarimiz vaqtini bekorga o‘tkazishmasin, ilm o‘rganaman, jamiyatga foyda keltiraman, degan shaxs har tomonlama mukammal bo‘lishga intilmog‘i lozim va bunga bugungi kunda imkoniyatlar keng ochilgan. Bunday talabalar har bir daqiqadan samarali foydalanishi va vaqtini bekorga sarflamasligi kerak.” – deydi Qahramon Mamatqulov
“ Shogirdim Qahramon Mamatqulovningfazilatlari, yutuqlari haqida soatlab gapirishim mumkin. Bugungi kunda Qaxramondek o‘nlab talaba shogirdlarim yutuqlarga erishib, shu sohada yangiliklar yaratishga o‘z hissalarini qo‘shishmoqda. Bu mening ko‘nglimda faxr tuyg‘usini uyg‘otadi. Ularning yutuqlaridan quvonaman. Qahramondek yurtga foydasi tegadigan yuzlab shogirdlarim bo‘lishini istayman va shu niyatda uni talaba yoshlarimiz bilan muloqot qilishi uchun chaqirtirdik. Kuzatishim bo‘yicha Qahramoning o‘tkazayotgan mashg‘ulotlarida talabalarimiz ancha faol. Ular ustozlarini savollarga ko‘mib tashlashayapti, nimalarnidir olishga intilishayapti.
Qahramonning yadroviy tibbiyot haqidagi fikrlari aslida olamshumul yangilik, buning zamirida esa mehnat va mashaqqat bor. U esa izlanishdan charchamaydi. Dunyo miqyosidagi ilmiy dargohda katta bir bo‘limni boshqarish, u yerdagi zalvorli mukofotlarga sazovor bo‘lish katta mehnatni, o‘tkir aql va bilimni talab etadi. Qahramon bu mehnatdan cho‘chimaydi. Dunyoviy bilimlarni egallashga, olganlarini o‘z vatandoshlari ehtiyojlari yo‘lida sarflashga doim tayyor turishga intiladi.
Talaba yoshlarimiz ko‘zlaridagi umidni va intiluvchanlikni ko‘rish men uchun baxt. Shu yil yozgi ta’tilda bir talabamizni Dubnaga talaba-almashuv dasturi bo‘yicha yozgi lagerga yubordik. U yerda talabamiz dam olish bilan birga dunyoning yetakchi oliygohlaridan, ilmiy markazhlardan kelib ma’ruzalar o‘qigan yetuk fizik olimlarning suhbatlaridan bahramand bo‘lib hamda ko‘plab mamlakatlardan kelgan o‘zi singari talabalardan do‘stlar orttirib, bir olam taassurotlar bilan qaytdi. Bu yerdagi kursdoshlari bilan olgan bilim va taassurotlarini baham ko‘rdi. Oldimizda ulkan rejalar turibdi. Ulardan biri talaba yoshlarimiz ichidan iqtidorlilarini saralab olib, ularni mana shunday xalqaro miqyosdagi ta’lim muassasalariga o‘qish va tajriba almashishga, ko‘nikmalarga ega bo‘lishga yuborishdir. Bu esa albatta o‘z samarasini beradi” – deydi Qahramonning ustozi fizika-matematika fanlari doktori, professor Rahmatilla Bekmirzaev
Jizzax davlat pedagogika instituti axborot xizmati
