7 aprel – haftalikning 3-kuni axborot-resurs markazining Elektron axborot-resurslar bo‘limida Pedagogika kafedrasi o‘qituvchilari hamda Jismoniy madaniyat fakulteti hamkorligida “Kitobxonlik haftaligi” doirasida “Ta’lim taraqqiyotida axborot-kommunikatsiya texnologiyalarining o‘rni” mavzusida amaliy seminar tashkil etildi. Amaliy seminarni axborot-resurs markazi direktori R.Ishnazarova ochib, kitobxonlarni haftalikda faol ishtirok etishga, darsdan bo‘sh vaqtlarida kitob mutolaasiga vaqt ajratishga da’vat etdi. Shundan so‘ng, Pedagogika kafedrasi o‘qituvchisi Ch.Ochilov axborot texnologiyalarining ta’lim jarayonida xususan, pedagogika va psixologiya fanlarini o‘qitishda tutgan o‘rni xususida so‘z yuritdi.
Tadbir davomida ARM yetakchi mutaxassisi S.Isroilova “Yangi adabiyotlar sizlar uchun” nomli adabiyotlar ko‘rgazmasini qisqacha sharhlab berdi va talaba-yoshlarni mazkur adabiyotlarni mutolaa qilishga chaqirdi.
So‘ngra, Elektron axborot-resurslar bo‘limi boshlig‘i G.Irgasheva ARMda zamonaviy texnologiyalar asosida axborot xizmatlari ko‘rsatishning yo‘lga qo‘yilishi to‘g‘risida so‘z yuritdi. Jumladan, kitobxonlarga institut sayti www.jdpu.uz va axborot-resurs markazi www.lib.jspi.us saytlari, bot va telegramm kanallari orqali axborot xizmatlari ko‘rsatish yo‘lga qo‘yilganligi, KerioControl tizimi orqali internetdan foydalanishlarni nazorat qilish to‘g‘risida ma’lumot berildi.
Tadbir yakunida ishtirokchi kitobxonlar o‘zlarini qiziqtirgan turli mavzuga doir savollarga javob oldilar. Bahs-munozarada talabalardan Sh.Markaboeva, D.Xonazarova, D.Mirzarahimovalar faol ishtirok etdi va axborot-resurs markazi tomonidan faxriy yorliq bilan taqdirlandi.
Shuningdek, shu kuni soat 14.00 da axborot-resurs markazining Ijtimoiy-gumanitar fanlarga ixtisoslashgan o‘quv zalida Chet tillar fakulteti Tabiiy va aniq fanlarda chet tili kafedrasi o‘qituvchisi A.Rustamov hamda Kimyo va geografiya yo‘nalishi talabalari ishtirokida “Men sevgan qahramon” mavzusida badiiy mutolaa tashkil etildi. Tadbirni kafedra o‘qituvchisi A.Rustamov ochib berdi va kitobxonlikni targ‘ib qilish bugungi kunning asosiy vazifasi ekanligini ta’kidladi. Shuningdek, ARM xodimasi M.Bobonazarova so‘z olib, talaba-yoshlarni vaqtni to‘g‘ri taqsimlash va unumli foydalanishga e’tibor qaratishlarini aytib o‘tdi.
Badiiy mutolaa Kimyo yo‘nalishining “Ilhom” jamoasi va Geografiya yo‘nalishining “Tafakkur” jamoasi o‘zaro bellashuvi tarzida olib borildi. Bellashuvda o‘qilgan badiiy asarlarning g‘oyaviy-tarbiyaviy mohiyati, asar qahramonlarining xarakter-xususiyatlari to‘g‘risidagi savollar o‘rtaga tashlandi. Bellashuv qizg‘in bahs-munozaralar va tortishuvlar bilan yakunlandi. Bellashuv hakamlarining xulosasiga ko‘ra, Kimyo yo‘nalishining “Ilhom ” jamoasi 136 ball to‘plab, badiiy mutolaa tadbirining g‘olibi bo‘ldi. Tadbir yakunida faol ishtirok etgan talabalar axborot-resurs markazi rahbariyati tomonidan faxriy yorliq bilan taqdirlandi.
