Jizzax davlat pedagogika universitetida tyutorlarning shaxsiy va kasbiy kompetensiyalarini rivojlantirish, pedagogik mahoratini oshirish hamda ta’lim jarayonida zamonaviy yondashuvlarni joriy etish maqsadida seminar-trening tashkil etildi. Seminarni R. Ishmuxamedov olib bordi. Tadbirda professor-o‘qituvchilar, tyutorlar, mentorlar hamda fakultetlar bo‘yicha ma’naviyat va ma’rifat ishlari mas’ul xodimlari ishtirok etdi.

Dastur doirasida o‘quv mashg‘ulotini tashkil etish strukturasi, o‘quvchi-bolalar bilan pedagogik didaktik o‘yinlar o‘tkazish metodikasi, tarbiya texnologiyalari, tadbirlarni tayyorlash metodikasi, xalq an’analari va urf-odatlari tarbiya vositasi sifatida hamda o‘qituvchi odobi va madaniyatiga oid pedagogik deontologiya mavzulari qamrab olindi.

Shuningdek, seminar davomida mentorlar ishtirokida davra suhbatlari va amaliy mashg‘ulotlar o‘tkazilib, pedagoglarning kasbiy mahoratini oshirishga qaratilgan interaktiv mashqlar bajarildi.