Jizzax davlat pedagogika universiteti hamda IT Park Jizzax filiali hamkorligida Jizzax viloyatidagi 5 ta oliy ta’lim muassasasi talabalari ishtirokida “Startup Survival: startapni saqlab qolish va rivojlantirish yo‘llari” mavzusida amaliy tadbir tashkil etildi.

Tadbir davomida ishtirokchilarga startaplarni rivojlantirish bosqichlari, yuzaga keladigan muammolarni samarali hal etish mexanizmlari, jamoa bilan ishlash, investitsiya jalb qilish va barqaror biznes modellarni shakllantirish bo‘yicha atroflicha ma’lumotlar taqdim etildi.

Shuningdek, tadbir doirasida Startup Garage platformasining faoliyati, uning imkoniyatlari va yoshlar uchun yaratilayotgan shart-sharoitlar haqida batafsil ma’lumot berildi. Ushbu tashabbus orqali talabalar o‘z g‘oyalarini sinovdan o‘tkazish, mentorlar bilan ishlash va loyihalarini rivojlantirish imkoniyatiga ega ekanliklari alohida ta’kidlandi.

Qolaversa, universitet talabalariga JSC Startup Community faoliyati ham tanishtirilib, ushbu hamjamiyat orqali startap tashabbuslarini qo‘llab-quvvatlash, tajriba almashish, hamfikrlar bilan hamkorlik qilish va yangi loyihalarni ilgari surish imkoniyatlari keng yoritib berildi.