Xalqaro hamkorlikni kengaytirish maqsadida Jizzax davlat pedagogika universiteti delegatsiyasi Xitoy Xalq Respublikasiga tashrif buyurdi. Delegatsiya tarkibidan o‘rin olgan o‘quv ishlari bo‘yicha prorektor F. Jo‘raqulov va Xalqaro hamkorlik bo‘limi boshlig‘i S. Yaxshilikov hozirda Xitoyda xizmat safarida bo‘lib turibdi.

Tashrifning dastlabki kunida delegatsiya Henan pedagogika universitetiga tashrif buyurib, ushbu oliy ta’lim muassasasi vitse-prezidenti janob SONG Ye bilan rasmiy uchrashuv o‘tkazdi. Uchrashuv davomida tomonlar ikki tomonlama hamkorlik aloqalarini yo‘lga qo‘yish, istiqboldagi rejalarni ishlab chiqish hamda qo‘shma tashabbuslarni amalga oshirish masalalarini muhokama qildilar.

Shuningdek, JDPU delegatsiyasi Henan pedagogika universitetining Xalqaro ta’lim instituti direktori janob ZHAO Yang, Xalqaro ta’lim fakulteti dekani janob DONG Hai hamda fakultet vakillari bilan uchrashuvlar o‘tkazdi. Muzokaralar davomida Jizzax davlat pedagogika universitetida xitoy tili kurslarini tashkil etish, talabalar almashinuvi dasturlarini yo‘lga qo‘yish hamda professor-o‘qituvchilarning malakasini oshirish bo‘yicha hamkorlik istiqbollari muhokama qilindi.

Ayni paytda universitet delegatsiyasining Xitoydagi tashrifi davom etmoqda. Tashrif doirasida yangi hamkorlik loyihalari yuzasidan muzokaralar va rasmiy uchrashuvlar o‘tkazilishi rejalashtirilgan.