Jizzax davlat pedagogika instituti Magistratura bo‘limi tashabbusi bilan “Temur tuzuklari bilimdoni” zakovat intellektual shousi o‘tkazildi. Zakovat bellashuvida Amir Temurning shoh asari bo‘lgan “Temur tuzuklari” kitobini sinchkovlik bilan o‘qigan va uqqan magistrlardan tashkil topgan 6 ta jamoa o‘zaro bellashdi. Mazkur intellektual o‘yinda qatnashchilar “Amir Temur va bugungi zamon”, “Amir Temurning harbiy saboqlari” hamda “Amir Temur o‘gitlari bilimdoni” kabi mavzular asosida tuzilgan murakkab savollarga javob berishga harakat qilishdi. Ta’kidlash joiz jamoalar g‘oliblik uchun qizg‘in bahs olib bordi.
“Sohibqiron Amir Temurni anglash–o‘zligimizni anglash demakdir. Amir Temurni ulug‘lash madaniyatimizga, qudratimizga asoslanib, buyuk kelajagimizni, ishonchimizni mustahkamlash demakdir. Sohibqiron tafakkurining mahsuli bo‘lgan «Temur tuzuklari» asarini qayta-qayta mutolaa qilish, uning mag‘zini chaqish har qaysi ziyoli inson uchun juda foydali ekanini hammamiz bilamiz. Bugungi tanlovda ishtirok etayotgan yoshlarimiz bu kitobni mehr qo‘yib, tushunib, chuqur anglab o‘qisa, ularning qalbida albatta milliy g‘urur tuyg‘usi yuksaladi.” – deydi institut rektori Sh.Sharipov
Darhaqiqat Sohibqiron bobomiz bizga meros qilib qoldirgan «Tuzuklar»ni o‘qigan borki, o‘zid katta ruhiy kuch-quvvat topgandek bo‘ladi. Tadbirda so‘zga chiqqanlar saltanat tashvishi bilan yashagan inson, buyuk davlat arbobining o‘y-fikrlari, hayot va kurash tajribasi haqida qiziqarli ma’lumotlarni taqdim etishdi.
Tomoshabinlar olqishi ostida qiziqarli tarzda bo‘lib o‘tgan Zakovat intellektual shousida g‘olib bo‘lgan jamoalarga esdalik uchun qimmatbaho sovg‘alar va maxsus diplomlar topshirildi. Institut Magistrlar bo‘limi magistrlari tomonidan Sohibqiron Amir Temur hayoti bilan bog‘liq teatrlashtirilgan sahnaviy ko‘rinishlar tadbirga yakun yasadi.
