Ayni paytda mas’ul nazoratchilar tomonidan abituriyentlarning shaxsini tasdiqlovchi hujjatlari belgilangan tartibda tekshirilib, imtihon binolariga kiritilmoqda.

Bugun, 6-iyul kuni jadvalga muvofiq Tasviriy san’at va muhandislik grafikasi hamda Musiqa ta’limi yo‘nalishlari bo‘yicha ilk imtihon jarayonlari bo‘lib o‘tadi.

Dastlab mas’ullar tomonidan abituriyentlarga kasbiy (ijodiy) imtihonlar dasturi, baholash mezonlari va ichki tartib-qoidalar haqida batafsil ma’lumotlar berilib, zarur tushuntirish ishlari olib borildi.

Tasviriy san’at va muhandislik grafikasi hamda Musiqa ta’limi yo‘nalishlariga hujjat topshirgan abituriyentlar o‘z iqtidor va mahoratlarini namoyish etishga kirishdilar.

Imtihonlar o‘tkazilayotgan binolarda ijod ahli uchun barcha zarur sharoitlar to‘liq mujassam etilgan. Jarayonlarning ochiqligi va shaffofligini ta’minlash maqsadida kutish joylarida maxsus monitorlar o‘rnatilgan bo‘lib, ota-onalar farzandlarining imtihon topshirish lahzalarini to‘g‘ridan to‘g‘ri, jonli efirda kuzatib bormoqdalar.