2016 йил 7 декабрь куни Жиззах давлат педагогика институти Маданият саройида ахборот- ресурс маркази ходимлари, институт маънавият бўлими, профессор- ўқитувчилар ва талабалар билан ҳамкорликда Ўзбекистон Конституциясининг 24 йиллигига бағишланган “Асосий қомусимиз – фаровон ҳаётимиз асоси” мавзусида маънавий – маърифий тадбир ташкил этилди.
Тадбирни институт ректори, профессор А.Холбеков кириш сўзи билан очиб берди: “Ҳурматли тадбир иштирокчилари! Сизларни Ўзбекистон Республикаси Конституциясининг 24 йиллиги билан табриклайман. Асосий Қомусимизда халқ ҳокимиятининг реал омиллари кўрсатиб берилган. Ҳаммамизга маълумки, давлатимизда амалга оширилаётган барча ишлар, сиёсий – иқтисодий, ижтимоий ва маданий ислоҳотларнинг ҳаммаси халқ, инсон манфаатлари, унинг турмуш тарзини яхшилашга хизмат қилади”.
Тадбирда Тарих факультетининг катта ўқитувчиси А.Орипов Ўзбекистон Республикаси Конституцияси тўғрисида маъруза қилди: “Бош Қомусимиз асосида мустақил тараққиёт йўлимиз белгилаб олинди. Бугунги кунда дунё ҳамжамияти томонидан “ўзбек модели” деб эътироф этилаётган бу йўл ўзининг ҳаётийлигини кўрсатмоқда. Конституциямизда халқимизнинг орзу – умидлари, менталитети ва улкан марралар ўз аксини топган. Ҳаётимизнинг барча соҳаларида амалга оширилаётган босқичма – босқич ислоҳотлар таълим соҳасида ҳам ўз самарасини бермоқда”.
Шундан сўнг, мавзуга доир тайёрланган “Асосий қомусимиз – фаровон ҳаётимиз асоси” номли адабиётлар кўргазмаси АРМ ходимаси М.Иргашева томонидан иштирокчиларга шарҳлаб берилди.
Тадбир сўнггида адабий – мусиқий байрам дастури намойиш этилди.
