Jizzax davlat pedagogika instituti Boshlang‘ich ta’lim nazariyasi va amaliyoti kafedrasi katta o‘qituvchisi Dilora Nusratova tomonidan 2-juftlik 514-xonada Boshlang‘ich ta’lim yo‘nalishi 1-bosqich talabalariga “Yig‘inli va ko‘paytmaning bo‘linishi haqida teoremalar” mavzusida amaliy ochiq dars o‘tkazildi.
Ushbu darsda darslik va o‘quv qo‘llanmalardagi mavjud teoremalardan tashqari ustoz tomonidan yozilgan va institut jurnalida nashr etilgan ilmiy maqolasida yoritilgan teoremalarga doir ham misol va masalalar yechildi. Ochiq darsda t.f.d., prof.X.To‘raqulov, fakultet uslubiy kengashi raisi f.f.d. N.Xadjimusaeva, fan o‘qituvchisi S.Temurovlar ishtirok etishdi.
Darsda talabalarning amaliy ko‘nikmalarini oshirishga alohida e’tibor berildi. Ular tomonidan darsda qiziqarli mavzuga oid rebuslar yaratildi, musobaqalar tashkil etildi.
Shuningdek, dars samarasi sifatida 101-guruh talabasi Muhayyo Jumaboevaning ustoz bilan birgalikda yozgan “Ayirma ko‘rinishidagi ifodaning bo‘linishi haqida teoremani o‘rgatishning afzalliklari” mavzusidagi maqolasi “Boshlang‘ich ta’limning zamonaviy tendensiyalari: ta’lim va tarbiya integratsiyasi” mavzusidagi xalqaro ilmiy-amaliy anjumani to‘plamiga qabul qilindi.
