Yangi yil tabrigi !

Qadrli Jizzax davlat pedagogika instituti jamoasi, Aziz ustoz va talabalar! Sizlarni qutlug‘ qadamlar bilan kirib kelayotgan Yangi – 2021yil  bilan chin dildan tabriklayman. O‘tgan 2020- “Ilm, Ma’rifat va raqamli iqtisodiyotni rivojlantirish yili” da  raqamli bilimlar va zamonaviy axborot texnologiyalarini egallashimiz uchun  zarur  birinchi qadamlar tashlandi. Ishonamanki kelayotgan  2021- “Yoshlarni qo‘llab-quvvatlash va aholi salomatligini mustahkamlash yili”  ham muammolarni yechimlarga, erishgan ishlarimizni yutuqlarga, qo‘yilgan vazifalarni natijalarga aylantiradi. 2020 yilda yurtimiz hayotida juda ko‘p o‘zgarishlar yaxshi kunlar, ulkan yutuqlar va marralar yili bo‘lish bilan bir qatorda yo‘qotishlar yili ham  bo‘ldi desak xato qilmagan bo‘lamiz. Dunyo bo‘ylab tarqalgan koronavirus kasalligi amalga oshirishimiz lozim bo‘lgan ezgu ishlarimizga to‘siq ham bo‘ldi. Hurmatli  ustoz va talabalar, aziz Jizzaxliklar ! O‘zbekistonimizning xalqaro maydonda obro‘-e’tibori yuksalib borayotgani barchamizga yaxshi ma’lum. Yakuniga yetayotgan 2020 yilning ayni shu yo‘lda Vatanimiz taraqqiyotiga, iqtisodiyotimizning barqaror rivojlanishiga, el-yurtimiz hayot darajasining yuksalishiga salmoqli hissa qo‘shgani, xosiyatli va barakali bo‘lganini shukronalik bilan ta’kidlashimiz lozim. Buning dalili sifatida dunyo  miqyosida hali-beri davom etayotgan Pandemiyaning  jiddiy ta’siriga qaramasdan, bir qator sohalar qatori  ta’lim tizimida ham ulkan o‘zgarishlar amalga oshirildi, desak, yanglishmagan bo‘lamiz. Kuni kecha davlat rahbari Parlamentga qilgan Murojaatnomasida kelgusi  2021- yilda ham bu sohada yanada katta o‘zgarishlar amalga oshirilishi belgilab berdi. Jumladan muhtaram yurtboshimiz Sh.M.Mirziyoev  o‘z murojaatida 2021 yilda 30 ta yangi maktab qurilishi, 320 ta maktabalar esa qaytadan ta’mirlanishi, boshqa tumanlardan olis tuman va qishloqlarga borib ishlaydigan o‘qituvchilarga 50 foiz,  viloyatlardagi chekka hududlarga  borib ishlaydigan o‘qituvchilarga 100 foiz ustama haqi to‘lanishi, ustoz va murabbiylarga munosib haq to‘lash keyingi yilda ham davom ettirilishi uchun davlat budjetidan  320 milliyard pul ajratilayotganligini alohida ta’kidlab o‘tdilar. Quvonarlisi shuki kelayotgan 2021 yilda OTM lar sifati va qamrovi oshiriladi. Davlat grantlari 25 foizga oshiriladi. Ehtiyojmand oilalarning qizlari uchun OTMlarda  grantlar soni 2 baravarga ko‘paytiriladi va 2000 mingtaga yetkaziladi. A’lo bahoga o‘qiyotgan ijtimoiy himoyaga muhtoj oilalarning qizlari uchun stipendiyalar tashkil etiladi. Bu siz aziz o‘g‘il qizlarimiz uchun juda katta imkoniyat. Yangi yilda ham ayni shu siyosatni izchil davom ettirish asosida aholimizning moddiy ahvoli yanada yaxshilanib, oylik ish haqi, pensiya, stipendiya va ijtimoiy nafaqalar miqdori o‘tayotgan 2020 yildagi raqamlardan kam bo‘lmaydi. Bu ham davlat rahbarining murojaatida keltirib o‘tildi. Bugun biz katta orzu-umidlar bilan kutib olayotgan yangi — 2021 yil haqida, barchamizning e’tiborimiz markazida turishi zarur bo‘lgan vazifalar haqida gapirganda, eng avvalo, qo‘lga kiritgan yutuqlarga mahliyo bo‘lmasdan, beparvolik kayfiyatiga berilmasdan, erishgan natijalarimizni tanqidiy baholab, hayot talablari bilan hamohang bo‘lib, ko‘zlagan istiqbolimizga qadam qo‘yishimiz nihoyatda muhimdir. Shu o‘rinda tarix sahifalaridan joy olayotgan 2020 yil instiutimiz hayotida muhim voqealarga boy bo‘lganini alohida ta’kidlash joiz. Jumladan, o‘quv jarayoniga yangi pedagogik texnologiyalarning joriy etilishi biz kutgan natijalarni berdi. Ilmiy tadqiqotlar borasida ham ahamiyatga molik, ijobiy yutuqlarga erishildi. Quvonarlisi yangidan-yangi ilmiy tadqiqotlar va ixtirochilik ishlari  jamoatchilik e’tiborini qozondi. Ma’naviyat va ma’rifat, madaniyat va sport sohasida qilingan ishlar, qo‘lga kiritilgan yutuqlar ham o‘ziga xos salmoqqa ega. Talabalar va jamoa uchun dastavval bir muncha muammolar tug‘dirgan masofaviy ta’lim  jarayoni izlanishlar va tinimsiz mehnat evaziga o‘z iziga tushdi. Oliygohda  tahsil oluvchi talaba yoshlarning yutuqlari bilan birga,  yosh o‘qituvchilarimizning ilmiy unvonlarga ega bo‘layotgani olib borilayotgan tizimli ishlarning samarasi desak, mubolag‘a bo‘lmaydi. Qutlug‘ qadamlar bilan kirib kelayotgan 2021 yilda ham Jizzax davlat pedagogika instituti  jamoasi katta-katta rejalarni amalga oshirish, bir qator xayrli tadbirlarni o‘tkazishni mo‘ljallamoqda. Qadrli ustozlar, muhtaram professor-o‘qituvchilar, aziz talabalar kirib kelayotgan Yangi – 2021 yilda sizga va oila a’zolaringizga mehnat faoliyatida, o‘qishda, jamoat ishlarida hamisha baxt va omad hamroh bo‘lishini tilab qolaman! Ilmiy, ijodiy, o‘qishdagi faoliyat va intilishlaringizda muvaffaqiyatlar tilayman. Sihat-salomatlik, shodu xurramlik, baxtu saodat barchamizga yo‘ldosh bo‘lsin. Yangi yilingiz muborak bo‘lsin, muhtaram institutimiz  jamoasi, qadrli professor-o‘qituvchilar va talabalar! Jizzax davlat pedagogika instituti rektori prof. Sh.S.Sharipov