Bir guruh professor-o‘qituvchilar va xodimlar joriy yilning 28-fevral – 1-mart kunlari “O‘zbekistonning Shveysariyasi” sifatida e’tirof etiladigan Zomin tumaniga sayohat uyushtirdilar.

Ishtirokchilar Zomin turistik-rekreatsion zonasi hududida, “Suffa” tekisligida barpo etilgan zamonaviy mehmonxonaga joylashib, tog‘ bag‘rida mazmunli dam oldilar. Tonggi musaffo havo, qorli cho‘qqilar va archazorlar bag‘ridagi betakror manzaralar barchada ko‘tarinki kayfiyat uyg‘otdi.

Sayohat davomida jamoa a’zolari dor yo‘li orqali balandlikka ko‘tarilib, tabiatning go‘zal manzaralarini tomosha qildilar. Yashil archazorlar va uzoqqa cho‘zilgan tog‘ silsilalari ishtirokchilarda unutilmas taassurot qoldirdi.

Tabiat qo‘ynidagi samimiy suhbatlar, do‘stona muloqot va xotira uchun olingan suratlar sayohatga alohida fayz bag‘ishladi. Ushbu tashrif nafaqat maroqli dam olish, balki jamoa birdamligini mustahkamlash, ruhiy ozuqa olish imkonini ham yaratdi.