Vazir: Masofadan o‘qiy olmagan talabalar uchun yoz oylarida darslar tashkillashtiriladi

Karantin davrida OTMlar talabalari uchun masofaviy tarzda tashkil etilgan ta’limda ishtirok eta olmagan talabalar uchun yoz oylarida alohida o‘quv mashg‘ulotlari tashkil etiladi. Oliy va o‘rta maxsus ta’lim vaziri Inom Majidov mazkur jarayon qanday tashkil etilishini izohladi. «Iyun oyi oxirida barcha OTMlarda o‘quv jarayonlari yakunlanadi. Hozirda masofaviy ta’limda ishtirok eta olmagan talabalar ro‘yxati shakllantirilmoqda. Iyul-avgust oylarida ular uchun o‘quv mashg‘ulotlari tashkil qilinadi. Talaba «yashil» hududda bo‘lsa, OTMga chaqirtirilib joylashtiriladi, pedagoglar tomonidan tarqoq holda darslar o‘tiladi. Talaba «qizil» zonada bo‘lsa, universitet yoki tumandagi kollejlar orqali kompyuterdan foydalanish, internetga kirish uchun imkoniyat yaratib beriladi. Ular bilan to‘g‘ridan to‘g‘ri emas, masofaviy tarzda mashg‘ulotlar olib boriladi», – dedi Majidov. Vazir talabalar turar joylarining foydalanilmagan davri uchun to‘lov masalasiga ham to‘xtaldi. «Talabalar turar joyidan karantin davrida foydalanilmagani bois shu davr uchun qilingan to‘lov qaytarib beriladi. Agar talaba keyingi o‘quv yilida ham talabalar turar joyida yashashni istasa, yashalmagan davr uchun mablag‘ni keyingi yilga o‘tkazib yuborishi ham mumkin», – dedi u.