Joriy yilning 18 noyabr kuni axborot-resurs markazining Majlislar zalida axborot-resurs markazi xodimlari, institut professor-o‘qituvchilar va talabalar ishtirokida To‘lqin Alimardonovning “O‘chmas sharaf” nomli kitobi yuzasidan taqdimot tadbiri bo‘lib o‘tdi.
Taqdimotni institut ma’naviyat ishlari bo‘limi boshlig‘i F.Qo‘shnazarov kirish so‘zi bilan ochib berdi:
“Respublikamizni juda murakkab va og‘ir yillarda boshqarib, vatanimiz taraqqiyoti yo‘lida fidokorona xizmat qilgan, ijtimoiy va ijodiy faoliyati bilan xalqimizning unutilmas yetakchisi va suyanchiga aylangan, ijodi bilan milliy adabiyotimiz va madaniyatimiz rivojiga katta hissa qo‘shgan atoqli davlat arbobi, taniqli adib Sharof Rashidovning yorqin xotirasini ulug‘lash hamda tavalludining 100 yilligini munosib nishonlash maqsadida 2017 yil 27 martda qabul qilingan Prezident farmoni xalqimiz ruhiyatini yanada ko‘tarib yubordi”.
So‘ngra, ARM yetakchi mutaxassisi S.Isroilova “O‘chmas sharaf” monografiyasi haqida qisqacha to‘xtalib o‘tdi: “T.Alimardonov qalamiga mansub “O‘chmas sharaf” monografiyasi buyuk davlat arbobi, ulug‘ adib, o‘zbek xalqining XX asrda yetishib chiqqan mutafakkir farzandi Sharof Rashidov tavalludining 100 yilligiga bag‘ishlangan bo‘lib, mazkur monografiya yosh avlodni ajdodlar qilgan buyuk ishlardan xabardor qilish, shaxsning ziddiyatli va murakkab faoliyatini to‘g‘ri anglash, real qahramonliklarni ko‘rsatib berish va ularga chuqur hurmat ruhida tarbiyalashda muhim manba bo‘lib xizmat qiladi”.
Taqdimotni fiolologiya fanlari nomzodi U.Qosimov davom ettirdi: “Monografiyada Sh.Rashidovning tarixda qoldirgan izi, hayoti va faoliyati juda ko‘p qirralarga asosan tahlil qilingan, xalq va shaxs, davlat va siyosat tarixiga oid ko‘plab yangi ma’lumotlar taqdim etilgan. Uni o‘qish davomida kitobxon millatning haqiqiy fidoiy farzandi tomonidan qaramlik sharoitida O‘zbekistonda qanchalar ulug‘vor ishlar qilinganligini xolis tahlillar va dalillar vositasida anglab oladi”.
Shuningdek, Tarix fakulteti 3-bosqich talabasi Eshkuvvatov Muhammad so‘z olib, ushbu monografiya yuzasidan o‘z fikr – mulohazalarini bildirdi: “Risola markazida Sharof Rashidov timsoli turadi. Timsol doirasiga qarab bir kichik risolada bir necha yuzlab chiziqlar tortiladi va bularning har biri bir soha belgisi. Bu quyosh barkashining ming-minglab torlarda nur taratishiga o‘xshab ketadi. Ularning har biri ustida qilingan talqinga oid fikrlar kishini to‘lqinlantiradi”.
Shuningdek, institut ARM bo‘lim boshlig‘i M.Hayitova so‘zga chiqib, “Bunday tadbirlarni tashkil etishdan maqsad talaba-yoshlarda kitobxonlik madaniyatini oshirish, ularning ma’naviy dunyosini boyitish va buyuk ajdodlarimizning ibratli hayot yo‘lidan voqif etishdan iborat”- deb ta’kidladi.
Tadbir yakunida talabalar o‘zlarini qiziqtirgan savollarga javob oldilar. So‘ngra ARM xodimasi D. Jabborova taqdimot ishtirokchilariga “Sharof Rashidov- 100 yoshda” nomli adabiyotlar ko‘rgazmasini qisqacha sharhlab berdi.
