Joriy yilning 31 may kuni Jizzax davlat pedagogika instituti axborot- resurs markazining majlislar zalida Tarix o‘qitish metodikasi kafedrasi hamkorligida “2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha harakatlar strategiyasi”ning mazmun-mohiyatini keng targ‘ib qilish maqsadida munozara-debat shaklida tadbir tashkil etildi. Tadbirda Tarix fakultetining professor-o‘qituvchilari hamda talabalari, axborot-resurs markazi xodimlari va Jizzax viloyat televideniyasi vakillari ishtirok etishdi.
Tadbirni fakultetning ma’naviy- ma’rifiy ishlar bo‘yicha dekan o‘rinbosari F.Aqchaev kirish so‘zi bilan ochib berdi. Shundan so‘ng, talabalar o‘rtasida “O‘zbekiston Respublikasini yanada rivojlantirish bo‘yicha Harakatlar strategiyasi to‘g‘risida”gi O‘zbekiston Respublikasi Prezidentining Farmoni hamda mazkur strategiyaning beshta ustuvor yo‘nalishi xususida munozara boshlandi.
Tadbirda fakultet talabasi N. Qo‘chqorov Harakatlar strategiyasining 1-ustuvor yo‘nalishi -“Davlat va jamiyat qurilishini takomilliashtirish” to‘g‘risida so‘z yuritdi. Talaba D. Tursunov strategiyaning 2-ustuvor yo‘nalishi- “Qonun ustuvorligini ta’minlash va sud –huquq tizimini yanada isloh qilishning ustuvor yo‘nalishlari” to‘g‘risida, B. Normamatov 3-yo‘nalish -“Iqtisodiyotni rivojlantirish va liberallashtirishning ustuvor yo‘nalishlari”, B.Nomozov 4-yo‘nalish – “Ijtimoiy sohani rivojlantirishning ustuvor yo‘nalishlari”, J.Sangirov 5-yo‘nalish –“Xavfsizlik, millatlararo totuvlik va diniy bag‘rikenglikni ta’minlash hamda chuqur o‘ylangan, o‘zaro manfaatli va amaliy ruhdagi tashqi siyosat yuritish” to‘g‘risida o‘z mulohazalarini bildirdilar. Barcha ustuvor yo‘nalishlar to‘g‘risida talabalar ijtimoiy hayotda o‘zlari uchratayotgan muammolarni o‘rtaga tashladilar va ularni bartaraf etish haqidagi o‘z fikrlarini bildirdilar. So‘ngra, institut axborot-resurs markazi xodimlari tomonidan tayyorlangan “Harakatlar strategiyasi- taraqqiyotimiz kafolati” mavzusidagi adabiyotlar ko‘rgazmasini ARM bibliografi N.Umarova ishtirokchilarga qisqacha sharhlab berdi.
Shuningdek, tadbir yakunida munozara-debat mavzusiga doir videolavha namoyish etildi.
