Ассалому алайкум қадрли юртдошлар, азиз жиззахликлар!!!

Мана баҳор байрамларидан бири бўлмиш Наврўз айёми ҳам ўлкамизга ўз таровати билан кириб келди. Хитойдан то Болқон давлатларига қадар чўзилган минтақа бўйлаб нишонланадиган ушбу байрамни ўзбек ҳалқи интиқлик кутади. 3000 йилдан ортиқроқ вақтдан бери аънанага айланган бу айём барчамиз учун меҳр –оқибат, саховат, тинчлик ва хотиржамлик улашувчи байрамдир.

Буюк алломаларимиз Абу Райҳон Беруний, Умар Ҳайём, Маҳмуд Қошғарийлар ўз битикларида Наврўзнинг кириб келиши, унинг тарихи ҳақида илмий ва асосли фикрларни билдиришган. Бир сўз билан айтганда Наврўз байрами тарихи инсоният илк цивилизациясига бориб тақалади. Қадим замонларда одамлар қуёш ва ой ҳаракатларини яқиндан кузатишган. Улар табиатда кечадиган ўзгаришларнинг моҳиятини англашга уринишган. Наврўз форс тилида «янги кун» деганидир. Миллий аънаналаримиз , урф-одатларимизни бор гўзаллиги билан оламга тараннум этаётган бу байрам билан ҳар қанча фахрлансак арзийди..

Ҳурматли Жиззах давлат пеадгогика институти жамоаси, азиз ёшлар!!!

Ҳамма жойда Наврўз оила билан бирга бўлиш, дўст-ёрларни зиёрат қилиш ҳамда марҳумлар хотирасига ҳурмат бажо келтириш фурсати бўлиб келган, одамлар баҳорнинг келишини йилнинг яхши келишига умид сифатида нишонлашган. Наврўз янгиланиш ва муроса фасли бўлиб, у оилаларга ўз мерос ва маданиятларини байрам қилиш, ўтган ўн икки ой ҳақида фикрга чўмиш ҳамда келажакка умид билан боқишга имкон беради. Ортга бир назар ташласак, бу йил кўпгина давлатлар учун оғир ва йўқотишлар йили бўлди. Жахондаги ривожланган давлатлар қаторида Ўзбекистон ҳам Пандемияни енгиш борасида бир қатор ишларни амалга оширишга эришди, курашди.

Ҳар бир йил ва ҳар баҳор умид билан бошланмоғи керак. Шундай кўтаринки руҳда ушбу Наврўзи оламга қучоқ очарканмиз, гарчи бу касаллик устидан тўлиқ ғалаба қозонмаган бўлсак ҳам, халқимиз, юртдошларимиз ўртасидаги меҳр оқибат, саховат, одамийлик каби эзгу фазилатлар янада ортиб ҳалқимизни яна бир жипслаштирди десак муболаға қилмаган бўламан.

Истардимки бу баҳор ҳамда Наврўзнинг келиши қутлуғ келиб нафақат юртимизда балки бутун дунёда кечаётган бу коронавирус офати батамом йўқолсин.

Наврўз барчамизга хайрли ишлар қилишимизда бир баҳона бўлсин. Баҳорнинг ушбу гўзал айёми қутлуғ келсин. Нарўзингиз муборак азизлар !!!

Баҳорнинг қайтиши, енгил шабада эсиб димоғингизга урилган ўрик гулларининг ажиб ифори ила гўзал-бу байрам барчангизга муборак бўлсин!

Жиззах давлат педагогика институти ректори проф. Ш.С. Шарипов.