«Sirdaryoliklar, siz bilan birgamiz!» Jizzax davlat pedagogika institutida o‘tkazilgan xayriya aksiyasi ana shunday nomlandi.
Avval xabar berganimizdek, Jizzax davlat pedagogika instituti tomonidan Sardoba suv omborida yuz bergan ofat natijasida jabr ko‘rganlarga ko‘maklashish maqsadida “Sirdaryoliklar siz bilan birganmiz!, xayriya aksiyasiga start berilgan edi. Joriy yilning 2 may kuni o‘z ishini boshlagan ushbu aksiyada Jizzax davlat pedagogika institutining professor –o‘qituvchilari va talabalari faol ishtirok etishdi. 
SHu kungacha xayriya yordamini qabul qilish punktiga 200 nafardan ziyod odamga mo‘ljallangan bolalar va kattalar ustki kiyimlari, ko‘rpa-to‘shak va yostiqlar, oyoq-kiyim, idish-tovoq, gigiena vositalari, oziq-ovqat mahsulotlari, bolalar o‘yinchoqlarini olib kelindi. Ehson qilingan barcha narsalar yig‘ilib kunlik viloyatimizga evakuatsiya qilingan sardobaliklarga jo‘natildi. Bundan tashqari, e’lon qilingan plastik kartalarga befarq bo‘lmagan ustoz va murabbiylarimizdan kelib tushgan pul mablag‘lariga zarur iste’mol tovarlari, oziq-ovqat mahsulotlari, dori-darmonlar hamda boshqa buyumlar sotib olindi va tabiiy ofatdan zarar ko‘rgan xonadon vakillariga etkazildi. Bugun ham ana shunday xayriya mablag‘laridan tushgan oziq-ovqat mahsulotlari, ro‘zg‘or buyumlari va antiseptik vositalar ortilgan yuk mashinasi Mirzacho‘l tumaniga jo‘natildi.
SHu o‘rinda Jizzax davlat pedagogika instituti jamoasiga, ko‘rsatgan bag‘rikenglik va ezguliklari uchun, shuningdek «Sirdaryoliklar siz bilan birgamiz!» xayriya aksiyasida ishtirok etib, murakkab ahvolda qolgan sirdaryoliklarni qo‘llab-quvvatlaganliklari uchun chuqur minnatdorlik izhor etamiz.
Jizzax davlat pedagogika instituti axborot xizmati
