Xabaringiz bor davlat rahbarining tegishli farmoniga ko‘ra mamlakatimizda xotin qizlar uchun 2020-2021 o‘quv yilida oliy ta’lim muassasalariag kirish uchun 4 foizlik davlat granti ajratilgan edi. Bugun bu imkoniyatdan respublikamizning turli go‘shalarida istiqomat qilayotgan 940 nafar xotin-qizlar foydalanib talaba bo‘lishdi.
Jizzax viloyati, Paxtakor tumani “Ulug‘bek” MFYda istiqomat qiluvchi Odilovlar oilasida bugun juda quvonchli kun. Ularning dilbandlari Farangiz Karimova A.qodiriy nomidagi Jizzax davlat pedagogika institutining “O‘zbek tili va adabiyoti” fakultetiga grant asosida o‘qishgaqabul qilindi. Xonadon bekasi Umida opa biz bilan suhbatda shunday dedi:
– meni bugun juda xursandman, qizim grant asosida talaba bo‘lish baxtiga musharraf bo‘ldi. Bugun bizning xonadonimizga Jizzax davlat pedagogika institutining rahbariyati kelib tabriklab ketgani esa yanada quvontirdi. Har bir ona farzandini komil inson bo‘lib voyaga yetishini chin dildan istaydi. O‘ylaymanki mening dilbandim Farangiz yurtboshimiz bildirgan ishonchni oqlaydi, a’lo baholarga o‘qib o‘z kasbining haqiqiy ustasi bo‘ladi.
Sevinch Temirxonova ham Farangiz Karimova kabi Paxtakor tumani Mahalla va oilani qo‘llab-quvvatlash bo‘limi tomonidan taqdim etilgan kvota asosida talabalik safiga qabul qilindi. Jizzax davlat pedagogika instituti O‘zbek tili va adabiyoti fakultetiga o‘qishga kirgan Sevinch Temirxonova minatdorchiligini shunday ifodalaydi:
-Bizga g‘amxo‘rlik qilib mana shunday imkoniyatlarni taqdim etgan yurtboshimizga minnatdorchiligimni bildiraman. Rostini aytsam bunday natijaga erishishimni kutmagandim, bugun judayam xursandman. Menga havas ko‘zi bilan qarayotgan tengdoshlarimga ham mana shunday baxt nasib etishini tilayman.
Bugun Jizzax davlat pedagogika institutiga Jizzax viloyatidan 16 nafar xotin-qiz oliy ta’lim muassasalariga ajratilgan 4 foizlik grant asosida o‘qishga qabul qilingan. Institut rektori talabalarning har biri bilan uchrashib, ularga o‘qish davomida yuksak natijalarga erishishni tilash bilan bir qatorda oliy ta’lim rahbariyatining esdalik sovg‘alarini ham topshirdi.
