O‘zbek adabiyotining zabardast vakilasi O‘zbekiston xalq shoiri Zulfiyaxonim ijodi va shaxsiyati millionlab qalblarni go‘zal tuyg‘ularga, cheksiz hurmatga oshno etaveradi. Necha yillardan buyon mamlakatimizda iqtidorli qizlar uchun Zulfiya nomidagi davlat mukofoti topshirilib, ularning har taraflama qobiliyatlarini rivojlantirish, kelgusida jamiyatda faolliklarini oshirish maqsadi ko‘zlangan.

Bu yili ham ushbu mukofot munosib egalariga taqdim etildi. O‘zbekiston Respublikasi Prezidenti Shavkat Mirziyoevning 2021 yil 2 martdagi Qaroriga binoan yurtimizdagi turli go‘shalaridan saralangan  qizlar qatorida  Jizzax davlat pedagogika institutining Xorijiy tillar  fakultetining  2-kurs talabasi  Muqaddas Mamarasulova  ham ushbu yuksak mukofot bilan taqdirlandi.

Bugun Muqaddas Mamarasulova quvonchli kun va taassurotlari bilan bo‘lishish maqsadida Jizzax davlat pedagogika instituti rektori Sh.Sharipov bilan qabulida  bo‘ldi.  Samimiy suhbat davomida Muqaddas  Mamarasulova bu yuksak mukofotni oqlash uchun yanada harakat qilishini, faollikni qo‘ldan bermay izlanishdan charchmasligini, bildirib o‘tdi. O‘z navbatida institut rektori Zulfiyaxonim mukofoti sohibasi shu nomga sazovor bo‘lib elning ardog‘idagi shoira ayol kabi ulug‘likka erishishini tiladi.

Suhbat so‘ngida institut rektori Muqaddas Mamarasulovani mukofot bilan yana bir bor  tabriklab  unga kitoblar to‘plamini sovg‘a qildi.