Jizzax davlat pedagogika universiteti hamda Janubiy Koreyaning Sejong universiteti vakillari o‘rtasida ikki tomonlama hamkorlikni yanada rivojlantirishga bag‘ishlangan uchrashuv bo‘lib o‘tdi.
Uchrashuvning asosiy mavzularidan biri sun’iy intellekt yo‘nalishida 2+2 shaklidagi qo‘shma ta’lim dasturini tashkil etish masalasi bo‘ldi. Tomonlar dastur doirasidagi o‘quv rejalari va fan dasturlarini muvofiqlashtirish, ta’lim jarayonini tashkil etish, kontrakt to‘lovlari, talabalarni qabul qilish va o‘qitish mexanizmlari kabi muhim masalalarni muhokama qildilar.
Muzokaralar yakunida qo‘shma ta’lim dasturini 2027-yil sentyabr oyidan boshlab yo‘lga qo‘yish bo‘yicha kelishuvga erishildi.
Shuningdek, uchrashuvda Sejong universiteti tomonidan tashkil etiladigan SW Coding Competency Test (TOSC) — dasturlash bo‘yicha bilim va ko‘nikmalarni baholash hamda tegishli sertifikat taqdim etishga mo‘ljallangan xalqaro test sinovlarini JDPUda muntazam o‘tkazish masalasi ham muhokama qilindi. TOSC orqali ishtirokchilar C va Python dasturlash tillari bo‘yicha o‘z bilim va amaliy ko‘nikmalarini baholash imkoniyatiga ega bo‘ladilar.
Mazkur tashabbuslar Jizzax davlat pedagogika universitetida sun’iy intellekt va dasturlash yo‘nalishlarida xalqaro ta’lim imkoniyatlarini kengaytirish, talabalarning zamonaviy raqamli kompetensiyalarini rivojlantirish hamda Koreya Respublikasining yetakchi oliy ta’lim muassasalari bilan akademik hamkorlikni yangi bosqichga olib chiqishga xizmat qiladi.
