Bugungi kunda giyohvandlik vositalari, ularning analoglari va psixotrop moddalar bilan bir qatorda, inson ongi va sog‘lig‘iga salbiy ta’sir ko‘rsatuvchi kuchli ta’sir qiluvchi yoki zaharli moddalar ham keng tarqalayotgani dunyo hamjamiyatini tashvishga solmoqda.

Shu bois mamlakatimizda giyohvandlik vositalari, ularning analoglari va psixotrop moddalarning noqonuniy aylanmasiga qarshi kurashish, yoshlar o‘rtasida giyohvandlik va narkotik moddalar bilan bog‘liq jinoyatlar sodir etilishining oldini olish maqsadida  turli uchrashuvlar targ‘ibot tadbirlari tashkil qilinmoqda. Navbatdagi tadbirlardan biri JDPU madaniyat saroyida bo‘lib o‘tdi.

Tadbirda  OAV xodimlari, JDPU professor-o‘qituvchilari, talaba yoshlar bilan bir qatorda IIB vakillari, sog‘liqni saqlash boshqarmasi hamda OITSga qarshi kurashish markazi mutaxassislari ishtirok etishdi. Tadbir davomida talaba-yoshlarga  O‘zbekistonda psixotrop moddalar bilan bir qatorda, inson ongi va sog‘lig‘iga salbiy ta’sir ko‘rsatuvchi kuchli ta’sir qiluvchi yoki zaharli moddalarning noqonuniy muomalasiga qarshi kurashish va uning oldini olish borasida olib borilayotgan chora-tadbirlar to‘g‘risida ma’lumot berildi.

Shuningdek, bu illatlarga mubtalo bo‘layotgan bemorlarning ayanchli holatlari to‘g‘risida tushunchalar berilib, ayniqsa oliy ta’lim muassasalari talaba yoshlari, maktab, litsey o‘quvchilari tomonidan yengil daromad topish maqsadida, giyohvandlik jinoyatlari sodir etilish holatlari kuzatilayotgani to‘g‘risida to‘xtalib o‘tildi. Tadbir talabalarda katta taassurot qoldirdi.Talabalar o‘zlarini qiziqtirgan savollariga soha mutaxassislaridan javoblar oldilar.

Tadbir yakunida JDPU talabalar teatr studiyasi tomonidan sahnalashtirilgan giyohvandlik va uning salbiy oqibatlaridan hikoya qiluvchi asar namoyish etildi.