Tadbirda Jizzax viloyati Maktabgacha va maktab ta’limi boshqarmasi boshlig‘i Ibodulla Rahimov, tuman ta’lim bo‘limlari vakillari, “O‘zmilliybank” AJ mas’ul xodimi Fozil Nizomov, O‘zbekiston Respublikasi Prezidenti huzuridagi Ijtimoiy himoya milliy agentligi vakili Baxtiyor Babayarov hamda universitet rahbariyati ishtirok etdi.
Uchrashuv davomida ish beruvchilar tomonidan ta’lim sohasidagi mehnat bozorining hozirgi holati, ishga joylashish imkoniyatlari, mavjud bo‘sh ish o‘rinlari va zamonaviy kasbiy talablar yuzasidan atroflicha ma’lumotlar berildi. Shuningdek, nazariy bilim va amaliy ko‘nikmalarni ish jarayonida samarali qo‘llash masalalariga alohida e’tibor qaratildi.
Tadbir doirasida “Kelajakka qadam” dasturi bo‘yicha “O‘zmilliybank” AJ mas’ul xodimi tomonidan taqdimot o‘tkazilib, bitiruvchilar uchun imtiyozli kreditlar, ularni rasmiylashtirish tartibi hamda yaratilgan imkoniyatlar haqida ma’lumot berildi. Qayd etilishicha, hozirga qadar 149 nafar bitiruvchiga jami 2 milliard 447 million so‘mdan ortiq kredit mablag‘lari ajratilgan.
Uchrashuv interaktiv shaklda o‘tib, talabalar o‘zlarini qiziqtirgan savollarga soha mutaxassislaridan batafsil javob oldilar. Mazkur tadbir universitet, ish beruvchilar va bitiruvchilar o‘rtasidagi hamkorlikni mustahkamlashga xizmat qilgan muhim amaliy platforma bo‘ldi.
