Kasbiy-ijodiy imtihonlar: shaffoflik va adolat ruhida o‘tmoqda

Ayni kunlarda barcha oliy ta’lim muassasalarida bo‘lgani kabi  Jizzax davlat pedagogika universitetida ham kasbiy-ijodiy imtihonlar qizg‘in davom etmoqda. Bugun ijodiy imtihonlarning ikkinchi kuni. Xabar berganimizdek bu jarayonda shaffoflik va adolat muhitini ta’minlash uchun universitet tomonidan barcha zarur chora-tadbirlar ko‘rilgan. Joriy yilda universitetga 3 mingdan ziyod  abiturientlar alohida iqtidor talab qilinadigan ta’lim yo‘nalishlari uchun ro‘yxatdan o‘tdi. Hech kimga sir emas bugun abiturientlar orasida kasbiy-ijodiy yo‘nalishlarga qiziqish yildan-yilga ortib borayapti. O‘z navbatida, abiturientlarning mahorat va bilimiga nisbatan talab ham kuchaymoqda. Abiturientlar tasviriy san’at va muhandislik grafikasi, musiqiy ta’lim, sport faoliyati va jismoniy madaniyat yo‘nalishlari bo‘yicha imtihon topshirmoqdalar. Oliygohda imtihon jarayonlarini namunali o‘tkazish bo‘yicha barcha shart-sharoitlar yaratilgan. Ayniqsa, universitet asosiy binosida joylashgan Musiqiy madaniyat fakulteti auditoriyalari musiqiy  va  sport zallarida bo‘lib o‘tayotgan tasviriy san’at va muhandislik grafikasi yo‘nalishlaridagi imtihon jarayonlari uchun zarur bo‘lgan barcha o‘quv jihozlari bilan to‘liq ta’minlangan. Shuningdek, Jizzax viloyati Yong‘in  xavfsizlik xizmati boshqarmasi sport maydonlarida bo‘lib o‘tayotgan sport faoliyati va jismoniy madaniyat yo‘nalishlari bo‘yicha imtihonlar ham qizg‘in ruhda o‘tmoqda.   Biz talaba bo‘lish imkoniyatini qo‘lga kiritish uchun kurashayotgan abiturientlarga omad tilab qolamiz. Ma’lumot uchun Ijodiy imhonlar joriy yilning 8 avgustigacha davom etadi. Jarayonlar har kuni universitetning barcha  rasmiy sahaifalarida berib boriladi. Bizni kuzatishda davom eting. Jizzax davlat pedagogika universiteti axborot xizmati.