1-oktyabr – O‘qituvchi va murabbiylar kuni munosabati bilan Jismoniy tarbiya va sport fakulteti dekani, professor Furqat Ahmedov O‘zbekiston Respublikasi sport vazirligining “Jismoniy tarbiya va sport a’lochisi” ko‘krak nishoni bilan taqdirlandi.

Kengash yig‘ilishi universitet rektori Maqsud Yuldashevning tabrik so‘zlari bilan ochildi. Rektor professor Furqat Ahmedovni ushbu yuksak mukofot bilan muborakbod etib, ustozga yoshlarga bilim berish bilan bir qatorda, universitet talabalarining sportning barcha turlari bo‘yicha jahon arenalarida yuksak natijalarga erishishida yangi marralarni zabt etishini tiladi.

Shundan so‘ng bir guruh professor-o‘qituvchilarga O‘zbekiston Respublikasi Oliy ta’lim, fan va innovatsiyalar vazirligi huzuridagi Oliy attestatsiya komissiyasi tomonidan berilgan ilmiy unvon va ilmiy darajalar attestatlari hamda diplomlar tantanali ravishda topshirildi.