Jizzax davlat pedagogika universitetida yosh ijodkorlar va jurnalistikaga qiziquvchi talabalar uchun mahorat darsi tashkil etildi. Uchrashuv O‘zbekiston Jurnalistlar uyushmasi raisi Shuhrat Orif ishtirokida, Jizzax viloyati Jurnalistlar uyushmasi hamda universitet hamkorligida o‘tkazildi.
Unda universitetning «Izlanish» klubi a’zolari, jurnalistika va ijodga qiziquvchi talaba-yoshlar ishtirok etdi. Muloqot davomida yosh jurnalistlarni qo‘llab-quvvatlash, ularning ijodiy salohiyatini ro‘yobga chiqarish, jurnalistika sohasida amaliy ko‘nikmalarini oshirish masalalari muhokama qilindi.
Mahorat darsida Shuhrat Orif jurnalistik faoliyatning o‘ziga xos jihatlari, kasb sirlari, axborot bilan ishlash va ijodiy yondashuv haqida fikr bildirdi. Ishtirokchilar o‘zlarini qiziqtirgan savollarga javob oldilar.
Uchrashuv yakunida yosh jurnalistlarni qo‘llab-quvvatlash maqsadida «Ijodkorlar seminari» kabi doimiy muloqot maydonlarini tashkil etish, yosh ijodkorlar uchun maxsus media platforma yaratish kabi takliflar ilgari surildi.
Ta’kidlanganidek, bunday uchrashuvlar yoshlarning jurnalistika va ijod sohasiga qiziqishini oshirish, ularning kasbiy va ijodiy salohiyatini rivojlantirishda muhim ahamiyat kasb etadi.
