Jizzax davlat pedagogika universitetida talabalar nafaqat bilim oladi, balki do‘stlik, birdamlik va milliy an’analarni qadrlaydi.

1-sonli talabalar turar joyida o‘tgan “Dekanlar osh” festivali ham ana shu qadriyatlarning yorqin namunasi.Tadbirni ochib bergan Yoshlar masalalari, ma’naviy-ma’rifiy ishlar bo‘yicha prorektor Farrux Akchayev osh chempionatiga start berdi.

TTJ hovlisi gavjum, oshga harakat va shirin tabassumlar, lutf-kalomlar dilga yoqadi. Bir tarafda sabzilar chopilgan, boshqa joyda go‘sht-piyoz qovurilib, olov miltillaydi. Kimdir o‘choqqa o‘t qalayapti, talaba qizlar dasturxonni hafsala bilan bezash taraddudida … Xullas, har bir fakultet o‘z uslubini namoyish etishga harakat qilmoqda. Hech kim qo‘l qovushtirib turgani yo‘q!

Qozonlar birdek qaynab, havoni qitiqlab yuborgan xushbo‘y hid barchaga “intizorlik” degan tuyg‘uni ulashmoqda. Dekanlar oshga gazak tayyorlashni ham unutmagan. Qo‘shiqlar, quvnoq raqslar esa bayramona muhitga yanada joziba qo‘shgan.

Universitetning “Pazanda” to‘garagi a’zolari o‘zlarining sirli retseptlarga boy, hil-hil salatlari bilan mehmonlarni xushnud etishdi.Yosh pazandalar tayyorlagan har bir salat nafaqat ko‘rinishi, balki ta’mi orqali ham mehmonlarni maftun etdi. Sabzavotlarning sharshara hidi, bezakli tartibi, mazali souslari barchaga zavq bag‘ishladi.

Vaqt keldi! Doshqozonlar qopqog‘i birin-ketin ochildi. Laganlardagi palovxonto‘ralar ko‘z quvnatadigan darajada turfa bezak va ta’m bilan suzildi. “Qaysini tatib ko‘ray?” degan muammo hakamlar hay’atini o‘ylatib qo‘ydi.

Hakamlar hay’ati 9 ta fakultet tayyorlagan oshga baho berar ekan, har bir laganga mehr bilan suzilgan taomda jamoa mehnati,birdamlikni ham hisobga olishdi. Osh damlash haqiqatan ham san’at ekanining isboti bu!

✨ 1. Eng mazali osh — Maktabgacha va boshlang‘ich ta’lim fakulteti ✨ 2. Eng nafis ko‘rinish — Tarix fakulteti ✨ 3. Milliy ruhdagi osh — Pedagogika, psixologiya va inklyuziv ta’lim fakulteti ✨ 4. Eng yangicha taomlanish — Tabiiy fanlar fakulteti ✨ 5. Eng xushbo‘y osh — Fizika-texnologik ta’lim fakulteti ✨ 6. Eng jamoaviy mehnat mahsuli — Filologiya fakulteti ✨ 7. Tomoshabinlar mehri — Jismoniy tarbiya va sport fakulteti ✨ 8. Eng diyetik osh — Tibbiyot fakulteti ✨ 9. Eng mehr bilan tayyorlangan osh — Aniq fanlar fakulteti

Festival natijasiga ko‘ra faqat bitta fakultet emas, JDPUning o‘zi — yagona jamoa sifatida g‘olib deb topildi. Bu kun JDPU tarixida munosib sahifa bo‘lib qoldi.

Turkcha qo‘shiqmi, xorazmcha raqsmi — farqi yo‘q. Hamma raqsga tushdi, quvondi, kuldi. hatto qozonlar ham “shaqq” etib raqsga tushib ketgudek.Shogirdlar, ustozlar, dekanlar… bir safda, bir ritmda! Osh festivali JDPU xotiralar daftariga katta harflar bilan bitildi. Zero bunday bayram… tez unutiladiganlardan emas! 😊🍚✨