Jizzax davlat pedagogika universitetida 17–18-noyabr kunlari “Innovatsion, raqamlashtirilgan va globallashgan jamiyatda jismoniy tarbiya va sportning o‘rni va vazifalari” mavzusiga bag‘ishlangan xalqaro ilmiy-amaliy konferensiya bo‘lib o‘tdi.

Konferensiyani universitet rektori, professor Maqsudjon Yuldashev ochib berdi. O‘z nutqida u xalqaro hamkorlikning bugungi globallashuv jarayonida tobora kuchayib borayotgani, bunday ilmiy anjumanlar esa hamkorlik aloqalarini mustahkamlashda muhim o‘rin tutishini ta’kidladi.

Shuningdek, sport sohasida erishilayotgan yutuqlar, jismoniy sog‘liq va sportning o‘zaro uzviy bog‘liqligi haqida so‘z yuritdi.

Tadbir avvalida xorijiy va qo‘shni davlatlardan tashrif buyurgan mehmonlarga esdalik sovg‘alari hamda milliy kiyimlar topshirildi.

Mazkur nufuzli anjumanda mahalliy va xorijiy oliy ta’lim muassasalari professor-o‘qituvchilari, ilmiy tadqiqotchilar, sport sohasidagi yetuk mutaxassislar hamda yosh olimlar ishtirok etishdi.

Konferensiya doirasida innovatsion pedagogik texnologiyalar, jismoniy tarbiya tizimini raqamlashtirish, zamonaviy sport tibbiyoti, sport psixologiyasi, ommaviy sportni rivojlantirish kabi dolzarb masalalar yuzasidan ilmiy ma’ruzalar tinglandi va amaliy tajriba almashildi.

Tadbir jismoniy tarbiya va sport sohasidagi ilmiy izlanishlarni qo‘llab-quvvatlash, ta’lim jarayoniga ilg‘or xorijiy tajribalarni joriy etish hamda yoshlar o‘rtasida sog‘lom turmush tarzini targ‘ib qilishga xizmat qildi.

Konferensiya uch tilda — o‘zbek, rus va ingliz tillarida olib borildi.

Konferensiyadan so‘ng mehmonlar universitet va Jismoniy tarbiya va sport fakultetida yaratilgan sharoitlar bilan tanishishdi.“Qatag‘on qurbonlari xotirasi” muzeylarida bo‘lishdi.