2024-yil 30-iyul kuni Jizzax davlat pedagogika universitetida JDPU va AQSh elchixonasi hamkorligida amalga oshirilgan “Akses” dasturining 2023–2025 yilgi mavsumi yakuniga yetdi.
Tadbir ilmiy ishlar va innovatsiyalar bo‘yicha prorektor G‘.O‘. Qodirovning kirish so‘zi bilan boshlandi. Marosim davomida dastur o‘quvchilari kuy-qo‘shiqlar, raqslar va ijodiy chiqishlari bilan ishtirokchilar qalbida bayramona kayfiyat uyg‘otdilar.
Dastur doirasida 35 nafar o‘quvchi muvaffaqiyatli ta’limni yakunlab, Mintaqaviy Ingliz tili idorasi tomonidan taqdim etilgan sertifikatlarga ega bo‘ldi. Sertifikatlarni Xorijiy tillar fakulteti o‘quv ishlari bo‘yicha direktor o‘rinbosari U. To‘pchiyev, grant dasturi koordinatori D. Bahriddinova hamda ingliz tili o‘qituvchilari tantanali ravishda topshirdilar.
Bitiruv marosimida ota-onalar universitet rahbariyatiga, AQSh elchixonasi ma’muriyatiga hamda dastur ustozlariga minnatdorlik izhor etdilar. Tadbir yakunida bitiruvchilarga kelgusidagi o‘qishlarida ulkan muvaffaqiyatlar tilandi.
