Jizzax davlat pedagogika universitetiga Hindistonning INFINYT3D PRIVATE LIMITED kompaniyasi vakili janob Ryan C. Vaz rasmiy tashrif buyurdi. Ushbu tashrif JDPU bilan imzolangan ikki tomonlama hamkorlik shartnomasi doirasida amalga oshirildi.
Tashrifdan ko‘zlangan asosiy maqsad — universitetda informatika, raqamli ta’lim texnologiyalari, STEAM ta’limi va robototexnika yo‘nalishlarida amaliy hamkorlikni boshlab yuborish, qo‘shma loyihalarni amalga oshirish va ilg‘or xorijiy tajribalarni joriy etishdir.
Uchrashuv davomida JDPU rektori, professor Shavkat Sharipov janob Ryan C. Vaz bilan muzokara olib bordi. Tomonlar o‘zaro hamkorlikni yanada mustahkamlash, jumladan, Hindistondan JDPUga malakali STEAM mutaxassislarini jalb qilish, ta’lim jarayoniga zamonaviy texnologiyalarni integratsiyalash va qo‘shma ta’lim dasturlarini yo‘lga qo‘yish masalalarini muhokama qildilar.
Ushbu tashrif JDPUda raqamli ta’lim, innovatsion yondashuvlar va xalqaro tajribalarni amaliyotga tatbiq etish yo‘lidagi muhim qadamlardan biri bo‘lib, universitetda mazkur yo‘nalishlarda olib borilayotgan ishlarning yangi bosqichga ko‘tarilishiga zamin yaratishi kutilmoqda.
