Jizzax davlat pedagogika universitetining Boshlang‘ich va maktabgacha ta’lim oliy maktabida bitiruvchi bosqich talabalarining ish beruvchilar va hamkor tashkilotlar vakillari bilan uchrashuvi tashkil etildi.

Unda maktabgacha va boshlang‘ich ta’lim yo‘nalishlarida tahsil olayotgan bitiruvchi talabalarga mehnat bozoridagi mavjud imkoniyatlar, hududlardagi bo‘sh ish o‘rinlari, ishga qabul qilish tartibi hamda kasbiy faoliyatni boshlash shartlari haqida ma’lumot berildi.

Uchrashuvda Jizzax viloyati Maktabgacha va maktab ta’limi boshqarmasining mas’ul xodimi Oybek Beknazarov, tizimdagi tuman va shahar maktabgacha va maktab ta’limi bo‘limlari kadrlar bo‘limi boshliqlari, «O‘zmilliybank» AJning «Kelajakka qadam» dasturi bo‘yicha mas’ul xodimi Oybek Ergashev, Boshqaruv samaradorligi agentligi Jizzax viloyati filiali bosh inspektori Zayniddin Beknazarov hamda hamkor tashkilotlar vakillari ishtirok etdi.

Tadbir davomida hududda pedagog kadrlarga bo‘lgan ehtiyoj, ta’lim tashkilotlaridagi mavjud bo‘sh ish o‘rinlari va bitiruvchilarni ishga qabul qilish jarayonlari yuzasidan tushuntirishlar berildi. Shuningdek, talabalarning o‘z mutaxassisligi bo‘yicha faoliyat yuritishi, kasbiy salohiyatini oshirishi va zamonaviy pedagogik ko‘nikmalarni egallashi muhimligi ta’kidlandi.

«O‘zmilliybank» AJning «Kelajakka qadam» dasturi doirasida bitiruvchilarga tadbirkorlik faoliyatini boshlash, biznes loyihalarini amalga oshirish va mavjud moliyaviy imkoniyatlardan foydalanish bo‘yicha ma’lumot va amaliy tavsiyalar berildi. Shu bilan birga, mehnat bozorida raqobatbardoshlikni oshirish, ishga joylashishda zamonaviy yondashuvlardan foydalanish, shaxsiy rivojlanish va kasbiy ko‘nikmalarni muntazam takomillashtirish masalalariga ham e’tibor qaratildi.

Uchrashuv yakunida talabalar o‘zlarini qiziqtirgan savollarga mutasaddilardan javob oldilar. Bitiruvchilarni mavjud bo‘sh ish o‘rinlariga yo‘naltirish, ularning bandligini ta’minlash va ish beruvchilar bilan hamkorlikni yanada kuchaytirish bo‘yicha amaliy kelishuvlarga erishildi.