«…Havasim sengadir. Shodlik ortmoqda,

Sarg‘aygan qor kabi erib ketar dard.

Mening yuragimdan fevral o‘tmoqda,

Sening yuragingga kirib bordi mart…»

Fevral oxirlamay turib bahor kirib keldi… sezayapsizmi havoda bahor hidi bor…

Endigina dunyoga kelgan go‘dak tabassumini ko‘rganmisiz? Men bahorni o‘sha go‘dakning tabassumiga o‘xshataman…Bahor tabiatning qayta tug‘ilishi, u bolalik orzusi, u go‘zallik elchisi, u ko‘ngil tozaligi… Bahorining iliq va samimiy, xushbo‘y ifori ko‘ngillarni uyg‘otadi…

Bugun o‘tib, Bahor kelarmush,

Tugar emish qarsillagan Qish.

Hayollarni etib faromush,

Kelin bo‘lib,

Bahor kelarmish!

 Kelar emish bokira qizdek,

Qo‘llariga qo‘yib hinolar.

Qoshi qaro, yuzi qirmizdek,

Nafasidek hushbo‘y havolar.

 Kelar emish bodroqdek bodrab,

Bola kabi shataloq otib.

Duolarda omonlik so‘rab,

Kelar emish erta tong otib!

 Kutganlarni bosib hayajon,

Tildan-tilga o‘tadi mish-mish.

Bugun tundan chiqolsak omon,

Erta tongda Bahor kelarmish…