Jizzax davlat pedagogika universiteti delegatsiyasi Amerika Qo‘shma Shtatlarining Massachusetts shtati, Boston shahrida joylashgan Harvard University va Massachusetts Institute of Technology (MIT) kabi dunyoning eng nufuzli oliy ta’lim muassasalariga tashrif buyurdi.
Mazkur tashrifning asosiy maqsadi — xalqaro hamkorlikni mustahkamlash, ilg‘or tajribalarni o‘rganish va universitetning ilmiy salohiyatini yanada rivojlantirishdan iborat bo‘ldi. Tashrif davomida Harvard va MIT universitetlarining xalqaro aloqalar bo‘limi vakillari, ta’lim texnologiyalari va innovatsion pedagogika yo‘nalishidagi mutaxassislari bilan uchrashuvlar o‘tkazildi.
Uchrashuvlarda zamonaviy ta’limni raqamlashtirish, o‘qituvchilarning malakasini oshirish, hamda pedagogika va lingvodidaktika sohasidagi ilmiy tadqiqotlarni qo‘llab-quvvatlash yo‘llari muhokama qilindi. Shuningdek, Harvard va MIT universitetlarida qo‘llanilayotgan innovatsion ta’lim yondashuvlari, ilmiy loyihalarni tijoratlashtirish va ta’limda sun’iy intellekt texnologiyalarini qo‘llash tajribasi bilan tanishildi.
Mazkur tashrif Jizzax davlat pedagogika universitetining xalqaro hamkorlik aloqalarini yanada kengaytirish, ilg‘or ilmiy-innovatsion tajribalarni o‘z ta’lim jarayoniga tatbiq etish hamda yosh olimlar uchun yangi imkoniyatlar yaratish yo‘lidagi muhim qadamlardan biri bo‘ldi.
