Mustaqillik yillarida qadimiy an‘analarimiz, qadriyatlarimiz qatori Navro‘z ham tiklandi. Bugun uni butun dunyoga ko‘z-ko‘z qilib tantana qilmoqdamiz. Mamlakatimizda bo‘lgani kabi, Geografiya o`qitish metodikasi yo`nalishida ham 16 mart kuni Navro‘z bayrami katta tantana bilan nishonlandi.
Geografiya o`qitish metodikasi yo`nalishida Navro‘z shukuhi, O‘lkamizda yana ko‘klam nafasi hukmron. Bahor o‘zi bilan birga insonlar qalbiga iliqlik, ongu shuuriga tiniqlik, vujudiga g‘ayrat-shijoat olib keladi. Bu faslda 8 mart–Xotin qizlar bayrami hamda qadimiy Navro‘z – yasharish va yangilanish ayyomini keng nishonlaymiz. O‘zbek ayollari va qizlarining go‘zalligi, mehr-vafosi va fidoiyligi ko‘klam sifatlariga oshufta bo‘lsa, Navro‘z koinot va tabiat qonunlari, quyoshning hamal burjiga kirishi, kecha va kunduzning tenglashuvi, tabiatda jonlanish boshlanishi bilan bog‘liq. Ushbu bayram tabiat va inson o‘rtasidagi mushtaraklik, uyg‘unlik tantanasi hamdir. Erta tongdan tabiatning jo‘shqinligi, quyoshning insonga xush yoquvchi zarrin nurlar sochishi yo`nalishimizning har bir xodimi, talabasi qalbiga iliqlik bag‘ishlagani aniq. Bahor yomg‘irlaridan keyingi bu iliqlik tabiatning ziyo taratuvchi jamoa uchun bayram tuhfasi bo‘ldi go‘yo. Kafedra mudiri g.f.n. O.L. Muxamedovning tabrik so‘zidan so‘ng bayramning badiiy qismi boshlanib ketdi. Navro‘z bayramining birdamlik va ahillik ramzi ekanligi sifatida barcha guruh talabalarinig bayramona badiiy chiqishlari barchaga o‘zgacha kayfiyat ulashdi. Milliy qadriyatlarimiz gultoji hisoblanmish Navro‘z shukuhi yurtimizda davom etmoqda
Tabiiy fanlar fakulteti xotin-qizlar
boshlang`ich tashkiloti raisi: M.M. Kayumova
