Jizzax qishloq xo‘jaligi mahsulotlarini yetishtirishga ixtisoslashtiriladi — Prezident qarori qabul qilindi

Joriy yilning 11 may sanasida “Respublika hududlarini qishloq xo‘jaligi mahsulotlari yetishtirishga ixtisoslashtirish bo‘yicha qo‘shimcha chora-tadbirlar to‘g‘risida”gi Prezident qarori qabul qilindi. Qarorda respublika hududlarini qishloq xo‘jaligi mahsulotlarining muayyan turlariga ixtisoslashtirish ishlarini samarali tashkil etish maqsadida eksperiment tariqasida 2020-2022 yillar davomida Jizzax viloyatining jami 116,3 ming gektar qo‘shimcha yer maydonlarini qishloq xo‘jaligi mahsulotlari yetishtirishga ixtisoslashtirish to‘g‘risidagi takliflari ma’qullangan. Shuningdek, qarorga binoan suv ta’minoti va infratuzilmasi mavjud bo‘lgan Zomin tumanidagi dengiz sathidan 1-1,5 ming metr balandlikda bo‘lgan Qoramozor hududidan 20 gektar yer maydonini Sabzavot, poliz ekinlari va kartoshkachilik ilmiy-tadqiqot instituti balansiga o‘tkaziladi. Ichki ishlar vazirligi hamda Yer resurslari, geodeziya, kartografiya va davlat kadastri davlat qo‘mitasi bilan birgalikda ikki oy muddatda Zafarobod tumani F.Xo‘jaev massivida joylashgan 30-son manzil koloniyasiga qarashli 513 gektar samarasiz foydalanib kelinayotgan sug‘oriladigan yer maydonini 2 400 boshli go‘sht yo‘nalishidagi chorva kompleksini tashkil etish va faoliyatini yo‘lga qo‘yish sharti bilan loyiha tashabbuskorlariga tanlov asosida ajratib berish choralarini ko‘radi. Bundan tashqari, Davlat geologiya va mineral resurslar qo‘mitasi bilan birgalikda 2020 yil III choragida Jizzax viloyatining Baxmal, G‘allaorol, Zomin, Forish, Yangiobod va Sh.Rashidov tumanlaridagi yangi o‘zlashtiriladigan lalmi yer maydonlarida bog‘dorchilik va uzumchilikni rivojlantirish uchun artezian quduq qazish va yer osti suvlaridan foydalanish maqsadida burg‘ilash ishlari tashkil etiladi. Qolaversa, 2021 yil 1 yanvardan boshlab 2023 yil 1 yanvarga qadar 5-ilovaga muvofiq ro‘yxat bo‘yicha chetdan olib kirilayotgan urug‘lar, ko‘chatlar va payvandtaglar, mineral o‘g‘itlar, o‘simliklarni kimyoviy himoyalash vositalari, zamonaviy energiya tejovchi issiqxonalar va ularning butlovchi qismlari, tomchilatib va yomg‘irlatib sug‘orish tizimlari hamda ularning butlovchi qismlari bojxona bojidan ozod etiladi. Qarorda shu kabi masalalar bayon yetilgan.