Horijdagi oliygohlarda sirtqi yoki masofaviy ta’lim olishni reja qilayotganlar diqqatiga!
O‘zbekistonda xorijiy OTM tomonidan berilgan masofadan o‘qitilgan va 3 yillik sirtqi ta’lim diplomlari tan olinmaydi.
Vazirlar Mahkamasi huzuridagi Ta’lim sifatini nazorat qilish davlat inspeksiyasi quyidagilarni ma’lum qiladi:
(http://tdi.uz/uz/news/view/ogoh-boling-ozbekistonda-xorijiy-otmlari-tomonidan-berilgan-masofadan-oqitilgan-va-3-yillik-sirtqi-talim-diplomlari-tan-olinmaydi)Ayni paytda O‘zbekistonda oliy ta’lim, kunduzgi, kechki va sirtqi shaklda olib boriladi. Amaldagi qonunchilikda oliy ta’lim olish uchun masofaviy ta’lim shakli nazarda tutilmagan.
Vazirlar Mahkamasining 2019 yil 24 iyuldagi 620-sonli qarori bilan bilan tasdiqlangan Nizomning 5-bob 36-bandida ma’lumot O‘zbekiston Respublikasi qonunchiligida nazarda tutilmagan ta’lim shaklida olingan bo‘lsa tan olishni rad etishga asos bo‘lishi belgilangan.
Yuqoridagilarga asosan xorijiy OTMlarda masofadan turib o‘qigani uchun berilgan diplomlar O‘zbekistonda tan olinmaydi.
Bundan tashqari, bir qator xorijiy OTMlari tomonidan bakalavriat uchun 3 yil yoki undan kam muddatga sirtqi ta’lim shakli bo‘yicha o‘qishga taklif etilmoqda.
Yurtimizda sirtqi ta’limda o‘qish muddati 5 yil etib belgilangan bo‘lib, xorijiy davlatlarda kasbiy ma’lumot to‘g‘risida hujjat beradigan ta’limning umumiy me’yoriy davri (to‘liq umumiy o‘rta yoki o‘rta ma’lumot olingandan keyin) O‘zbekiston ta’lim standartlarida nazarda tutilgan davrdan ikki yildan kam bo‘lsa hujjatlarni tan olish rad etilishi belgilangan.
Shunday qilib, xorijiy OTMlarning bakalavriat yo‘nalishi bo‘yicha sirtqi ta’lim shaklida 3 yil yoki undan kam muddatda o‘qib olingan diplomlari O‘zbekistonda tan olinmaydi.
Quyidagi holatlarda xorijiy davlatlarda ta’lim olganlik to‘g‘risidagi hujjatlar maxsus sinovlarsiz tan olinadi:
O‘zbekiston hududida filiallari mavjud OTMlarni tugatganlar;
Dunyo universitetlari reytingida TOP-1000talikka kirgan OTMlarni tugatganlar;
Mutaxassislarni maqsadli tayyorlash uchun xorijiy davlatlar tomonidan ajratilgan kvotalar hisobidan xorijiy OTMlarni tugatganlar;
1992 yil 1 yanvargacha xorijiy OTMlarga o‘qishga kirganlar;
Yevropa sifat kafolati assotsiatsiyasi (ENQA) tomonidan akkreditatsiyalangan OTMlarni tugatganlar;
AQSh, Avstraliya, Isroil, Kanada, Singapur, Janubiy Koreya, Yaponiya davlatlarining vakolatli organlari tomonidan akkreditatsiyalangan OTMlarni tugatganlar;
Mutaxassislarni maqsadli tayyorlash uchun O‘zbekiston vazirlik va idoralari tomonidan ajratilgan mablag‘lar hisobidan xorijiy OTMlarni tugatganlar;
O‘zbekiston Prezidenti va Vazirlar Mahkamasining qarorlar bo‘yicha xorijiy OTMlarga maqsadli o‘qishga yuborilganlar.
