Mamlakatimiz Prezidenti Shavkat Mirziyoyev tomonidan ilgari surilgan “Yoshlar kuni” tashabbusi doirasida Yoshlar ishlari agentligi direktori o‘rinbosari Kattaxonova Dilnoza Sobirjonovna hamda agentlikning bir qator vakillari Jizzax davlat pedagogika universitetiga tashrif buyurdi.

Tashrif davomida 10 ga yaqin startap loyihalar taqdimoti o‘tkazilib, yoshlarning taklif va tashabbuslari muhokama qilindi. Shuningdek, Prezidentimiz tomonidan yoshlar bilan uchrashuvda ilgari surilgan ustuvor g‘oya va tashabbuslar talabalarga yetkazildi.

Universitet rektori Yuldashev Maksudjon Abdullayevich mehmonlarga oliygohda amalga oshirilayotgan yangilanishlar, yaratilgan shart-sharoitlar va istiqboldagi rejalar haqida batafsil ma’lumot berdi.

Uchrashuv yakunida mehmonlarga universitetning ramziy sovg‘alari topshirildi. Shundan so‘ng delegatsiya tomonidan universitetda yaratilgan zamonaviy infratuzilma va ta’lim jarayoni uchun mavjud sharoitlar o‘rganildi.