O‘zbekiston Respublikasi Prezidentining “Aholi salomatligi va millat genofondini giyohvandlik va narkojinoyatlardan samarali himoya qilish bo‘yicha kompleks chora-tadbirlar to‘g‘risida”gi Farmoni ijrosi doirasida Jizzax davlat pedagogika universiteti talabalari jazoni ijro etish muassasasiga tashrif buyurdilar.
Jizzax viloyati, Jizzax shahar, «A» sanoat hududida joylashgan Jizzax viloyati Jazoni ijro etish departamenti uchinchi mintaqaviy hudud 29-sonli markaziy koloniyasiga universitet talabalarining tashrifi tashkil etildi.
Talabalar koloniya faoliyati bilan yaqindan tanishib, mahkumlar bilan o‘tkazilgan davra suhbatida giyohvandlikning oqibatlari nafaqat shaxsning hayotini barbod qilishi, balki uning oilasi, atrof-muhiti va butun jamiyat uchun og‘ir ijtimoiy muammolarga sabab bo‘lishiga bevosita guvoh bo‘ldilar.
Eslatib o‘tamiz, ushbu masalada Maktabgacha va maktab ta’limi vaziri hamda Oliy ta’lim, fan va innovatsiyalar vaziri yoshlar, ota-onalar va pedagoglarni giyohvandlik hamda narkojinoyatlarning salbiy oqibatlaridan ogohlikka chaqiruvchi qo‘shma murojaatni e’lon qilishgan edi. Bu murojaat Jizzax davlat pedagogika universiteti rektori tomonidan ham keng targ‘ib qilinmoqda.
